بخش 1 : مقدمه
.
.
اولان قطب مدار عالمه محور یاتا بلمز
خدای لاینامین نورینه مظهر یاتا بلمز
.
اگر یاتسا مداریندن چیخار دوران امکانات
مقام عدل موجوداتیده داور یاتا بلمز
.
تعادلدن چیخار درهم اولار منظومۀ شمسی
اودور کیم تا قیامت خسرو خاور یاتا بلمز
.
اگر منزل کسه بیر کاروان یول اوسته دینجلسین
یورولسا یاتسا اهل قافله رهبر یاتا بلمز
.
یاتار تُپراقلار اوسته جسم بی سر، گون قباقینده
ولی مطبخ سراده رأس بی پیکر یاتا بلمز
.
مسلمدور که زهرا سینه سینده بسلنن بیر باش
تنور ایچره اولا بالینی خاکستر یاتا بلمز
.
بو باش بیر باشدی دامان پیمبرده یاتوب دائم
اگر آغوش زهرا اولماسا بستر یاتا بلمز
.
نئجه یاتسون ستمله آیریلوب شبه پیمبردن
آلوب آرامینی هجر علی اکبر یاتا بلمز
.
سکینه لبلرینده تا عطش آثاری وار باقی
اولونجا حشر چشم چشمۀ کوثر یاتا بلمز
.
آلوب زخم سنان و تیغ و خنجر لذّتین دویموب
سراغ خیزرانیله گزر بو سر یاتا بلمز
.
محقر منزلینده مقدم زهرایه شایقدور
گوگولدن خانۀ هجراندا وصل ایستر یاتا بلمز
.
یارالی رنج دیده بیر باشا ممکن دگول یاتماق
علاوه خاک و خونیله دولان گوزلر یاتا بلمز
.
«کلامی» ماجرای آل طاهانی یازان شبلر
قلم دوشمز الیندن باغلاماز دفتر یاتا بلمز
.
بخش 2 : سوال حضرت زهرا (س) از امام حسین (ع) در تنور خولی
.
باشیندا شور عشقُ الله اولان بیر باش بئله یاتماز
خصوصاً بیر باشیکه واردی قلبینده گِلَه یاتماز
.
قالان باشسیز عیالی ظلموله قید و سلاسلده
قولون آچدیرماسا زنجیردن سرسلسله یاتماز
.
دلیل کاروانِ عشق اولان نوک جدالرده
یورولماز یتمینجه قافله سرمنزله یاتماز
.
لبِ دریاده عطشان باش وئرن کوی محبتده
عیالین چکمسه گرداب غمدن ساحله یاتماز
.
یرینی میهمانون میزبانی ائتمسه راحت
ئوزی آسوده اولماز نازیله هرگز بئله یاتماز
.
اوزاق یولدان آنان ای نور دیده دیدیوه گلمیش
دل شبده اوغول مشتاق اولان درد دله یاتماز
.
خطرناک ئولکه ده دشمن ایچینده اهل بیتندن
اولوب غافل بو نوعیله امیر قافله یاتماز
.
گلوب شور اوسته زینب ، نی کیمی دلدن نوا ایلر
بالا قزلار قولوندا وار نه قدری سلسله یاتماز
.
شکسته دل قرانلوق خیمه ده جور مخالفدن
گول اوزلی قزلارون بلبل کیمی گَلمیش دله یاتماز
.
رُبابون ناله سی قویماز سکینه خواب ائده بیر آز
رقیه داد ائدر اولموش ایاقی آبله یاتماز
.
حجازی ترک ائدن دشت عراق ایچره اولان محصور
او پای ناقۀ لیلا اگر دوشسه گیلَه یاتماز
.
بو مکتبده هله ناقصدی تحصیلاتی «عاصینون»
دولونجه نخل تحصیلاتی کامل حاصله یاتماز
.
بخش 3 : جواب امام حسین (ع) به حضرت زهرا (س)
.
اشکی تبریزی
.
عشقینده مقصده آنا من تک چاتان یاتار
باشدان خیال جاه وجلالین آتان یاتار
.
جانان یولوندا ترک ایدن اوز خانمانینی
عشق اوسته سو یانیندا ویرن تشنه جان یاتار
.
کوی وفاده من کیمی سرمست عشق اولان
معشوقینه ویرن بیله بیر امتحان یاتار
.
عاشق بیر عمر یاتماسا ایّام هجریده
بزم وصال یاره یته بیر زمان یاتار
.
مهمان خولیم بو گیجه میزبان سنه
گرچه قوناقی راحت ایدر میزبان یاتار
.
اما بو باره ده منی معذورم عفو ایله
وار علتی بو خسته دل کوفیان یاتار
.
بیر باش که تندن اون ایکی ضربتله آیریلا
اَوَّل گیجه کول اوسته اولا میهمان یاتار
.
خوش گلموسن منی بو گیجه یاده سالموسان
وصلیله نار هجر دل عاشقان یاتار
.
درد دله دل اهلی دل شبده دل آچار
چون بزم یار خلوت اولار دیگران یاتار
.
باشیم تنور ایچینده کول اوستنده میهمان
کربُبلاده جسمیمه بستردی قان یاتار
.
فکر ایلمه بالالاریمین فکرین ایتمورم
گول خار الینده قالسا مگر باغبان یاتار
.
بو باره دن ولی آنا آسوده خاطرم
بیجا دَگُل بو پیکری باشسیز قالان یاتار
.
یانموش چادردا چونکه حسینین بُلور اوزی
زینب کیمی بالالارا وار مهربان یاتار
.
گرچه باجیمدا بو گیجه یورقوندی خسته دور
یاتماز ولیک یاتسادا چوخ ناگران یاتار
.
گر یاتماسا ربابیله لیلانین حقی وار
گول غنچه سولسا بلبل خوش نغمه خوان یاتار؟
.
اما حسینین عشقینه نقصاندی یاتماسا
کول اوسته وار رضای حق لامکان یاتار
.
چوخ یرده بو باشین آنا چوخ ماجراسی وار
هر یرده وار مُصاحب و بیر همزبان یاتار
.
بوردا سنیله دیریده نصرانی شامیده
چوخ نازیله بو باشی آقاجدان آسان یاتار
.
اوردا بالام رقیه منه همزبان اولار
نصف شب اونداکی باشیما پاسبان یاتار
.
بلم سکینه بوگیجه چوخ آه و زار ایدر
آتلار دوشینده چوللره یوخسا قاچان یاتار؟
.
اوغلون حسین آنا ایله مخمور عشقیدور
لعل لبین ئوپونجه دم خیزران یاتار
.
ثارالهی اگرچه توکوب ظلمیله عدو
#اشکی خیال ایلمه هرگز بو قان یاتار
.
بیر گون ایدر اوز اوغلی بو قان ادعاسینی
بو شورش و بو غلغله بُل اول زمان یاتار
.
استاد دور بو بارده #عاصی گوزل یازوب
یاتماز اونون کلامیدی #اشکی یازان یاتار
.
- شنبه
- 5
- مرداد
- 1398
- ساعت
- 14:23
- نوشته شده توسط
- ابوالفضل عابدی پور
- شاعر:
-
ولی الله کلامی زنجانی
ارسال دیدگاه