اولوبسان گول کیمی پرپر
گوز آچ گلدیم علی اکبر
باتیبسان قانیوه یکسر
گوز آچ گلدیم علی اکبر
.
گلستانِ شهادتده
گوزل جسمون اولوب لاله
دوزولموش آغ گولون اوسته
منظم قانیله ژاله
دانیش منلن باشون اوسته
بابوندور ایلین ناله
دوشوبدور قلبیمه اخگر
گوز آچ گلدیم علی اکبر
.
باشون اوستن توانیم یوخ
دورام ای شبه پیغمبر
وورور طعنه گولور اوغلوم
منه بو لشگر کافر
سپهر عشقی غم دوتموش
بو گون ای تئز سوز‌ن اختر
حسینی غم ائدیب مضطر
گوز آچ گلدیم علی اکبر
.
باشون منشق اولوب آی تک
دوتولموش قانیله خالون
ائدیب احوالیمی برهم
سنین بو پوزقون احوالون
یاتیبسان خاک خون ایچره
اوجالمیش شأن اجلالون
گییبسن جامۀ احمر
گوز آچ گلدیم علی اکبر
.
قتیل اوّل اولدون سن
ره قرآن جاناندا
سرای سرّه سیر ائتدون
بو وحشتلی بیاباندا
هله بیر سود امر واردور
خیام آل عمراندا
آخر قربان اولار اصغر
گوز آچ گلدیم علی اکبر
.
گئدیرسن باغ رضوانه
بو نوعی باغریقان اولما
منیم یالقوزلوقومدان سن
عزیزیم ناگران اولما
محافظ دیر حق منان
آنوندان ناگران اولما
سالیب گر چه قرا معجر
گوز آچ گلدیم علی اکبر
.
بو شأن منصبی تاپماق
اوغول روحه صفا ایستر
بو یولدا جان به کف دورماق
صفا ایستر وفا ایستر
قوجالسا هر آتا من تک
قوجا وقتی عصا ایستر
حسین سند‌ن سورا نیلر
گوز آچ گلدیم علی اکبر
.
قالیب گوز یولدا اولادِ
علی ای خسته ترلانیم
سنی گوزلر بیبون باجون
اویان ای غملی جانانیم
خیامه دور گئد‌ک منلن
منیم ایستکلی جانانیم
آنون لیلا سنی گوزلر
گوز آچ گلدیم علی اکبر
.
- شنبه
- 5
- مرداد
- 1398
- ساعت
- 14:26
- نوشته شده توسط
- ابوالفضل عابدی پور
- شاعر:
-
حاج محمد تقائی
ارسال دیدگاه