هر کیم ایستور چاره قیلسون درد بی درمانینه
چنگ وورسون ساقی دشت بلا دامانینه
.
حضرت عباسه صدقیله توسل ایلسون
تا یتیرسون حق اونی ائوز دردینون درمانینه
.
منصبی باب الحوائجدور ائوزی کان عطا
گوز تیکیبدور اهل عالم لطف بی پایانینه
.
هیچ کیمی نومید ایتمز درگهوندن بو آقا
چون کرم دریاسیدور ایلر نظر مهمانینه
.
روز اول باغلامیشدی یاریله پیمانینی
لازم اولسا هر زمان جان بذل ایده جانانینه
.
آی دولاندی ایل دولاندی یتدی روز امتحان
چکدی عباسی قضا دشت بلا میدانینه
.
اول منای عشقیده ویردی نشان ائوز همتین
عهدینه ایفا ایدوب پابند اولوب پیمانینه
.
استقامتله دایاندی مرتضانین وارثی
قویمادی صدمه یتیشسون ذرّه جه ایمانینه
.
اونداکی دشمن امان نامه گتوردی حضرته
سویلدی ایتمم توجه دشمنون فرمانینه
.
من علینون اوغلیام باش اگمرم اهریمنه
وقفیدور جانیم همیشه کربلا سلطانینه
.
نیلورم من بو امانی بو مقام و منصبی
ویرسه لر دنیانی ویرمم شاهمین بیر آنینه
.
رهبریمدن گرمنه اذن جهاد اولسا یقین
لشگر کفری بویاندیرّام بو چولده قانینه
.
من حسین ابن علینون درگهون ترک ایتمرم
چون همیشه وار نیازیم سفره احسانینه
.
باش و جانیمدن گرکدور من گیچم بو دشتیده
یتمسون تا صدمه قارداشیم حسینون جانینه
.
چون همیشه حالیمه شاملدی لطف شاه دین
ایستورم تا سون نفسده باش قویام دامانینه
.
روز و شب رزاقی دا حسرتده دور بیرده گیدوب
کربلاده ئوز قویا اول حضرتون ایوانینه
.
- پنج شنبه
- 10
- مرداد
- 1398
- ساعت
- 11:21
- نوشته شده توسط
- ابوالفضل عابدی پور
- شاعر:
-
ستار رزاقی
ارسال دیدگاه