دولاندیم کوچه به کوچه تاپام بیر امن ماوانی
دریغا اولمادی بو کوفه ده آرامش امکانی
.
الهی رحم ائله بیر کیمسه یوخدور یاوریم اولسون
قوتارسون درد و غمدن غربت ایچره بو پریشانی
.
مگر نامه یازانلار هاردادی امدادیمه گلسون
ندندور گورسنور بو شهریده چوخ نابسامانی
.
نه واردور کیمسه احوالیم سورشسون دردیمی بولسون
نه واردور کیمسه سیراب ایلسون بو تشنه قربانی
.
نقدری سسلدیم اولاد هاشمدن منم مسلم
گلون ترک ائتمیون بو کوفه ده سیز آل طاهانی
.
نه امداده گلن اولدی نه حالیمی بولن اولدی
عجب داندی جماعت الده کی بو عهد و پیمانی
.
یهودی گلسه هر ایوده تاپار امنیت کامل
ندندور کیمسه قبول ایلمیر من تک مسلمانی
.
گلون رحم ایلیون چوخ یورقونام بوردا قوناقم من
قوناقه حرمت ایلر کیمسه نون گر اولسا ایمانی
.
یورلدوم کوفه دن بو کوفه اهلی نامسلماندور
مگر بولمور قیامتده قورولسا حشر دیوانی
.
سوروشسا مسلمه هر کیم حمایت ایلیوب گلسون
تاپولماز بیر نفر اول یرده گلسون جز گلر هانی
.
خبر یوخدور حسینیمدن صبایه لطف ایله یارب
خبر وئرسون عم اوغلوم گلمه سون الدن گئدر جانی
.
دئسون یول گوزلمه هیهات بیرده مسلمون گلسون
سفیرون اولدی آقا ظلمیله اول یرده زندانی
.
نه تنها کوچه ده پیشواز ائدوبلر تازیانیلن
ووروب شمشیریلن صاف قالمادی آغزوندا دندانی
.
خبروئرسون عیالون تئز گوتور شاماتیدن چئخ گئت
خیامون یاندیرالار یاندیرانلار باب زهرانی
.
دئسون پیمبره بنزر بالانی یولدا قیترسون
اگر گلسه بو چولده اوج ائدر لیلانون افغانی
.
مروت یوخ گتورسه اصغری بو غملی صحرایه
عیاندور حرمله الده وورار اوچ شعبه پیکانی
.
دئسون بیرده ابالفضلی عمواوغلی چوخ مواظب اول
گتورسن اوخلانار مشکی فرات اوسته آخار قانی
.
ازل بیتی یازاندا « صادقی » بیرآیری حال تاپدی
یازوبدور مسلمون احوالینه بو غملی عنوانی
.
دولاندیم کوچه به کوچه تاپام بیر امن ماوانی
دریغا اولمادی بو کوفه ده آرامش امکانی
- دوشنبه
- 14
- مرداد
- 1398
- ساعت
- 10:17
- نوشته شده توسط
- ابوالفضل عابدی پور
- شاعر:
-
محمدرضا صادقی
ارسال دیدگاه