شهر کوفه ده قوم کوفیان
غرق ائدوب منی قانه یا حسین
باش یارا بدن لخته لخته قان
لطف قیل غریبانه یا حسین
.
.
کوفه خلقنون یوخ کفایتی
قویدولار گور آواره مسلمی
شهر کوفه نون بو جماعتی
ایلیوبدی بیچاره مسلمی
زادۀ زیادین سیاستی
آز قالوب چکه داره مسلمی
کوچه لر بوجاقینده قالمیشام
گتدیلر منی جانه یا حسین
.
.
وار بالالاریم منله هم سفر
بلمورم داخی هاردادور بالام
هانسی کوچه ده خوار و دربدر
فرصت اولموری آختارام تاپام
یا که اونلاری ممکن اولسا گر
یثربه ساری من یولا سالام
غربت ئولکه ده طفل بی پناه
یوخ یانان او طفلانه یا حسین
.
.
اهل کوفه ده یوخ حسین وفا
گلمه کوفیه من فدا سنه
یوخ بو اهلده ذرجه حیا
ظلم ائدر بولار برملا سنه
شهر کوفیه گلسون ای آقا
یوز وئرر او گون مین بلا سنه
عرض مسلمی ایلسون قبلو
گلمسن بو سامانه یا حسین
.
.
نائبم ایشیم دوشدی مشکله
عرض ائدم گرک اصل مطلبی
کوفیان وئرر اوندا ال اله
شامه گوندرر شمر زینبی
قویما کوفیه قارداشون گله
واردی چون اباالفضل منصبی
نهر علقمین اوسته چون ایکی
قول دوشر او میدانه یا حسین
.
.
ای صبا یتور شاهه عرضیمی
گلمه کوفیه ای فلک جناب
قویما اکبری ساخلا قاسمی
ادتمه مجتبی قلبینی کباب
اوخلانا اگر تشنه اصغرون
آغلیا گرک حشره تک رباب
قانلو پیکرین بی کفن قالار
قان آخار بیابانه یا حسین
.
.
شهر کوفه ده جانه دویموشام
خوار ائدوب منی قوم کوفیان
قان گئدوبدی بی طاقت اولموشام
سو کیمی آخار کوچه لرده قان
تک قلج ووروب چوخ یورولموشام
یالقوزام کمک یوخ عم اوغلی جان
هر نه ایستدوم ممکن اولمادی
بی ایچیم سو عطشانه یا حسین
.
.
حکم اولوب سواره پیادیه
دوره دن گلوب دوتدولار یولوم
یوز قویوب او دارالاماریه
اشعث اوغلودور باغلیان قولوم
گورمک ایستسون باخ قناریه
وقت اولوب سنه من فدا اولوم
الوداع حلال ایله حقّیوی
باتمیشام قزل قانه یا حسین
.
.
«نادری» اورک داغلا مسلمه
نه کمک نه بیر آشناسی وار
آغلاسون اگر آغلا مسمله
نه باجی نه قیز نه آناسی وار
ساخلاسون عزا ساخلا مسلمه
نه قبیله نه اقرباسی وار
چون غریبدور شیعه لر قورار
مسلمه عزاخانه یا حسین
.
- دوشنبه
- 14
- مرداد
- 1398
- ساعت
- 10:50
- نوشته شده توسط
- ابوالفضل عابدی پور
- شاعر:
-
مرحوم نادری میانجی
ارسال دیدگاه