منی تک گوروبدی اعدا
ایلیور جفا حسین جان
بورا گلمه اهل کوفه
ایلمز وفا حسین جان
.
.
من او مسلمم که گیچدیم
ره حقده جان و سردن
باشیما رضایم الله
گله هرنه بو سفردن
قاپوا حسین دخیلم
داخی گیتمرم بو دردن
منه نوشیدور یولوندا
گله هر بلا حسین جان
.
.
منی یولادون بو شهره
اولام عشقووین سفیری
بیله کوفی لر بو شهره
گلر عالمین امیری
اَوَل احترام ایدوبلر
منه خردیلن کبیری
دیدیلرهاچان بو شهره
ویره جک صفا حسین جان
.
.
بیله حالی گوردی مسلم
سنه یازدی نامه تزگل
غم وغصه لر بو یرده
یتشوب تمامه تزگل
بولار احترام ایدللر
سن کیمی امامه تزگل
گوروشون تمام درده
اولاجاخ دوا حسین جان
.
.
ولی کوفه ده عقیده
عوض اولدی گلمه مولا
داخی یوخدی همنشینیم
منی تک قویوبدی اعدا
بورا گلمه گرچه وصلون
سنون ایلورم تمنا
بوغریبه کوفه اهلی
ایلیور جفا حسین جان
.
.
اولا آزقالیر سفیرون
بو زمان فدای اصغر
داخی قالمیشام آدامسیز
گله داده خوشدی اکبر
بویور ابن عمیم عباس
یتیشه هرایه آخر
گورم ئولمه میش او ماهی
ایلورم دعا حسین جان
.
.
فقط (آذرین) دگول کی
قاپوا دخیل اولوبدی
هامی آستان بوسِ
شه بی بدیل اولوبدی
کیم اوزاق دوشوب قاپوندان
ابدی ذلیل اولوبدی
قاپوا گرکدی شاهلار
اولالار گدا حسین جان
.
- دوشنبه
- 14
- مرداد
- 1398
- ساعت
- 10:51
- نوشته شده توسط
- ابوالفضل عابدی پور
- شاعر:
-
ودود آذرین خلخال
ارسال دیدگاه