کاروان مکه دن عزتلی بیابانه گلور
آشنادور هامی عشقه دیمه بیگانه گلور
.
پیشوا لشکر عشاقه دیوم کیمدور؟حسین
یارینون محضر پر نورینه جانانه گلور
.
سسلنور کعبه دالیجا دایان ای قبله دل
یانار هجرونده سنون بیت خدا جانه گلور
.
دیور آستاری آپار ویر منیده زینبوه
سالا باشه قاباقا چونکه عزا خانه گلور
.
یوخیدی مروه صفانون دوزومی گئتمه گینه
زمزم معرفتون چشمه سی طوفانه گلور
.
قال دیور منده پیمبر کیمی سن غار حرا
باخمیور سمت جبال عربستان گلور
.
منده قربانلاروی ویر دیور هی کوه منا
عشقیلن فاطمه اطهره ریحانه گلور
.
عرفه گورمز حسینینده دعای عرفات
کوی عشقینده دوتوب داش وراشیطانه گلور
.
کعبه عشقه غرض باغلادی احرام حاجیلار
ویریله زینت کامل نچه قربانه گلور
.
کاروان مرتبه حسنی تاپوب اکبریلن
یثربون یوسفی یعقوبیله کنعانه گلور
.
یوسف مصر دوشوب محبسه یالوارمشیدی
بو ولی یالوارور اللهه نه زندانه گلور
.
شاد اولور لیلی باخان وقتیده زیبا یوزونه
شمع امیدینه پر ورماقا پروانه گلور
.
گوسترور خدمتینی زینبه سقای حرم
دوزولوب دور برینده نچه فرزانه گلور
.
هی دیور عزّتیمی آلما الیمدن یا ربّ
منه چوخ گورمه امیدیم بو عزیزانه گلور
.
هامونون گوزلری اوچ سنیّده زهرانی گزور
هله آغوشیده نازیله او دُردانه گلور
.
عطر نابه بوکولوب پیکره حجب و حیا
دارانا زلفلری محضرینه شانه گلور
.
ائیلور عبّاس یوزون سینه ده جنّت گولی تک
گل زیبای محبتدی گلستانه گلور
.
چاتمیوب آلتی آیی باشه هله صود امرون
ام مگه سینه ده صود شوقیله پستانه گلور
.
بوس اولور نور الهی بورین صورتدن
خرداجا عاشقیدی یوللاری مستانه گلور
.
ای قلم کچمه شهادت غمینی ایله رقم
خیمه دن یاز علی اصغر نئجه میدانه گلور
.
سس گلور ئوپ یوزون آخیر ئوپوشون اولسون حسین
اصغرون سینهٔ زهرای پریشانه گلور
.
بوغازیندان وورلار زهریلی اوخ پارچالیار
شهدادن دالی قالماز بویانا قانه گلور
.
یوللارام قانلی قماطین ئوپه اهل ملکوت
عرشیده زائر اولار اصغر عطشانه گلور
.
یارالی حلقون ئوپنده آناسین یادوه سال
یری چادرده حسین مادر گریانه گلور
.
تئز یتور قتلگهه چوخدی یولون گوزلینی
قوشولا محسنیمه روضه رضوانه گلور
.
بدنی خسته اولوبدور ال ایاق چالماقدان
غرق اولوبدور نئچه گون اشک فراوانه گلور
.
رتبهٔ باب الحوائج ویرورم اصغروه
تلسور چوخ یتیشه عزّت شایانه گلور
.
سن کیمی منده اونون خاطرینی ایستیورم
عشق بیماری دواخانیه درمانه گلور
.
ایوون آباد کچورسن قوزی قربانوندن
آلتی آیلقدا کمک اولماقا قرآنه گلور
.
یا حسین نام #معزی یازیلا دفتروه
اردبیلدن حرم پاکه چو دیوانه گلور
- شنبه
- 19
- مرداد
- 1398
- ساعت
- 14:7
- نوشته شده توسط
- ابوالفضل عابدی پور
- شاعر:
-
استاد یوسف معزی اردبیلی
ارسال دیدگاه