دولاندی قتلگهی تاپدی اکبرین لیلا
حدیث درد دله آچدی دل که واویلا
.
باخوب نه گوردی خدایا که گورمَسون آنالار
ایدوبدی جسمنی باشدان ایاقه قان یارالار
.
عَمامه پارچالانوب نازنین باشی یاریلوب
نفس باتوب گوز آخوب جان گیدوب سینه داغیلوب
.
گوروب یارالیدی باشدان اَیاقه گُل جسدی
یانقلی قلبیله سسلندی آه یا ولدی
.
سنه قلج ویرانون من گوروم شَل اولسون اَلی
اَلیمی اوزدون اَلوندن بِلیمی بوکدون علی
.
نجه گوروم سنی هانسی آنایه بو گورونوب
بابان علی کیمی باشون علی ایکی بولونوب
.
گوزوم گوتورمز اوغول بیله بی کفن قالاسان
بو ایسّی قوملارین اوستُنده اَل ایاق چالاسان
.
او خَم قاشون کیمی یاخشی خَم ایلدون بِلیمی
بلی آنایه چتیندور جوان اوغول اُلومی
.
گَرَک اُلونجه ویرم من اجازه گوز یاشیما
ایویم یخیلدی فلک توکدی یاخشی کول باشیما
.
او عزّتیله گیچن گونلریم باشا یتدی
باشیم اوجالیقی سنله خانملقیم گیتدی
.
همین او بیر باخشون قلبموندی منظوری
بو قدر ناز ایلمه آچ گوزون گوزوم نوری
.
اورک دوگونمه سی جان لرزه سی گوزوم یاشی
بو نوع گیتسه اگر باشه آغلادور داشی
.
هجوم ایدوب غم و محنت آناوی یالقیزلار
من ایمدی بولدوم اوغول نیلوری اوغولسوزلار
.
محبّتون منه چوخدور اونی اوزوم بوللّم
گوزون آچوب یوزیمه ایمدی باخماسان اُللّم
.
سنون بو گُل یوزون هر کس سالوب طراوتدن
تعجّبم نجه خوف ایتمیوب قیامتدن
.
دولاندی باشینه اگلشدی سیلدی قانلی گوزون
او قان دوتان یوزینه قویدی بیرجه حسرت اوزون
.
گلوب او دمده آنالیق محبّتی جوشه
قولون حمایل ایدوب چکدی نعشین آغوشه
.
بویادی قانه اوزین دوشدی حِسّدن جانی
گورن دیردی که لیلا اُلوب آخار قانی
.
یریندن اوینادی شوق وصاله مرغ روان
یانندا دوشدی قالوب مثل صورت بی جان
.
زمانه ویرمدی فرصت پوزولدی وصلت یار
خیال وصلت هجر ایتدی عاشقی بیدار
.
گوروب باش اوسته جَرَس کوسِ رحلتین وُوردی
اَلین قویوب دیزینه یا علی دیوب دوردی
.
گیدردی گاه دوراردی چَکردی دلدن آه
یوزون دوتوب گوگه هردم دیردی یا الله
.
منیم قصاصیمی یا رب سن آل او ظالمدن
اَلیمی اوزدی منیم ظلمیله عَیالیمدن
.
وُوراردی هر قدمینده ایکی اَلین دیزینه
باخاردی چیگنینون اوستوندن اوغلونون یوزینه
.
باخاردی اکبره هر بیر قدم او ناقه سوار
اوزاقلاشوب او قدر تا گوزیندن اولدی کنار
.
چولون گورردی که بیر گوشه سی منوّر دور
دیردی قلبی که بو نور جسم اکبر دور
.
یوزون دوتاردی او نوره دیردی حسرتیلن
ایاقه دور گور آناوی اوغول بو ذلّتیلن
.
سن ایله کرب و بلانی وطن خداحافظ
بغیشله گیتملیم شامه من خداحافظ
.
خدنگ عشقیله بو یولدا سینه می دَللّم
مزارون اوسته سنون بیرده اُلمَسم گَللّم
.
اگر چه بوشدور اَلیم «هندی» گنه گارم
اوغول آناسی گورور اکبره عزادارم
.
- دوشنبه
- 21
- مرداد
- 1398
- ساعت
- 12:10
- نوشته شده توسط
- ابوالفضل عابدی پور
- شاعر:
-
مرحوم هندی تبریزی
ارسال دیدگاه