سن ندن میدانه باجی دلده واویلا گلوبسن
بلموسن یوخسا خیمده غش ایدوب لیلا گلوبسن
.
.
ای آنام زهرا نشانی بو نجه حالتدی سنده
بُلموسن یوخسا که واردور احتضار احوالی منده
بس نجه لیلا دایانسون من بو احواله دوشنده
صبریوی الدن ویروب میدانه بی پروا گلوبسن
.
.
صبر ایله هرگز الیندن ویرمه باجی اختیارین
چوخ سور پرهیز ائدن عورتلری پروردگارین
رونق دین اوسته سعی ائت حفظ قیل عزّ و وقارین
سن او عورتسن باجی بو عالمه تنها گلوبسن
.
.
ائتموسن بو گلماقوندا گرچه یاخشی فکر و تدبیر
جان ویروردوم داغ اکبر قلبیمه ائتموشدی تأثیر
تا سسین گلدی وئروب احوالیمه بیر اوزگه تغییر
اکبریم یاددان چیخوب گوردوم که یا اختا گلوبسن
.
.
گوزلریم گل صورتینده اوغلوما مشغولیدیم من
دوره دن اما گولوردی حالیمه بیرحم دشمن
سسلینده قارداشیم وای قارداشیمین اوغلی وای سن
حالتیم تغییر تاپدی بلدوم اوندا که گلوبسن
.
.
منجنیق غم اگرچه قلبیوی بیحد سخوبدور
خانۀ صبرین آنام باجی غم و محنت یخوبدور
سالمیوبسان باشه یوخسا معجرین یاددان چخوبدور
خیمه لردن سن بو وضعیله برهنه پا گلوبسن
.
.
نخل امیدیم یاتوبدورنازیله القان ایچینده
قان شفقدور گزلنوب گویا مه تابان ایچینده
خوش دگل ای شمس عصمت دورماقون میدان ایچینده
دوره دن ایلور شماتت لشگر اعدا گلوبسن
.
.
قورتولوب جدّیم الیله اکبریم سوز عطشدن
طایر روحی ائدوب پرواز جلد مُنکَمِشدن
سن قِییت حاله گتور لیلانی باجی حال غشدن
کیم اونا ویرسون تسلّی سن بیله آیا گلوبسن
.
.
گرچه چوخ یاره ووروبلار بو شبیه مصطفایه
پیکرین اوخ نیزه قران تک یازوبدور آیه آیه
لیک ممکندور یغام اعضاسینی منده عبایه
خیمیه تا حمل اولا بو دوغرانان اعضا گلوبسن
.
.
گئت خیامه سن علی اکبره قور بزم ماتم
دوغرانان نعشین من ایندی بیر عبا ایچره گتورَّم
لیلیه آندور بو سرّی من گلینجه قویما مبهم
ماجرانی ائتموسن گرچه اونا ایما گلوبسن
.
.
«اشکیا» اولدی بو سوزده ئوزلریندن لطف شامل
گر عنایت اولماسیدی مطلبین اولمازدی حاصل
اولدی زهرادن توجه بیله شیرین اولدی بو دل
یادیوه مضمونی سالدی قافیه حتی گلوبسن
.
.
- دوشنبه
- 21
- مرداد
- 1398
- ساعت
- 12:25
- نوشته شده توسط
- ابوالفضل عابدی پور
- شاعر:
-
حاج مجید اشکی تبریزی
ارسال دیدگاه