ای حجازی شهریاریم
کوفیه گلمه عم اوغلی
عزت و شأن و وقاریم
کوفیه گلمه عم اوغلی
کوفه اهلینده وفا یوخ
محنت وجور وجفا چوخ
بوجهتدن ای نگاریم
کوفیه گلمه عم اوغلی
.
یابن زهرا یابن زهرا
یابن زهرا یابن زهرا
.
.
.
بیرپریشان خاطریم وار
درد الیندن دردالیندن
کوفه شهرینده مشقّت
چکمیشم نامرد الیندن
اهل تزویر و ریانین
اولموشام دلسرد الیندن
شوکتیم سن اعتباریم
کوفیه گلمه عم اوغلی
.
.
.
کوفه شهرینده عم اوغلی
کیمدی مهمان اولدوروللر
خاصه کیم اولسا بویرده
اهل ایمان اولدوروللر
یوخ سوزوم ابن عقیلی
زار و نالان اولدوروللر
چون گئدور الدن قراریم
کوفیه گلمه عم اوغلی
.
.
.
ظاهر معناده گوزدن
بارش نیسان توکوللر
گوئیا گنج شرفدن
دانۀ مرجان توکوللر
مرتضانی اولدورنلر
ظلم ائدوب هی قان توکوللر
ای حبیب کردگاریم
کوفیه گلمه عم اوغلی
.
.
.
سن که واقف سن عم اوغلی
قدرتیم وار فوق العاده
دست بیعت وئرمرم من
کوفه ده ابن زیاده
گرچه بو شهر بلاده
غملریم اولدی زیاده
لاکن ای دار و نداریم
کوفیه گلمه عم اوغلی
.
.
.
جبهۀ جنگ و جدلده
گیمیشم رخت شهادت
قیل دعا که حضرت حق
ایلسون لطف و عنایت
خدمتیم اولسون قبول
زادۂ شاه ولایت
لاکن ای محبوب یاریم
کوفیه گلمه عم اوغلی
.
.
.
نخل غم ابن عقیلین
باشی اوسته سایه سالدی
.اولدی آماج بلالر
دوره سین دشمنلر آلدی
سنله دیداریم بویردن
محشر کبرایه قالدی
اولدی بو آخرشعاریم
کوفیه گلمه عم اوغلی
.
.
.
(مژده ) غم نامه یازاندا
یاد ائدر مولاحسینی
سسلیر فریاده هردم
زادۂ زهرا حسینی
ذکرائدر مولامنیم تک
یاربی همتا حسینی
یعنی ای شأن و وقاریم
کوفیه گلمه عم اوغلی
- سه شنبه
- 22
- مرداد
- 1398
- ساعت
- 14:7
- نوشته شده توسط
- ابوالفضل عابدی پور
- شاعر:
-
مژده اردبیلی
ارسال دیدگاه