نقل ائدر مجلسی مرحوم بزرگ علما
زاده ی هندیله دعوا ائلیوب شیر خدا
جنگ صفّینه مهیّا اولونوب اهل وفا
معاویه نیّت منحوسینی تعقیب ائلیوب
لشکرین وعده ی بی حاصله ترغیب ائلیوب
.
.
امرانون قاباقیندا قالانوب زر توکولوب
آچیلوب بار شترلر یره شش پر توکولوب
ایکی یوز مین نفره نیزه و خنجر توکولوب
زر پرستانه اوگون نقره و زر پایلاندی
نفراته توکولن اسلحه لر پایلاندی
.
.
لشکر نوریده سن منظره ی دیگره باخ
تربیت یافته ی مدرسه ی حیدره باخ
عهد و پیمانلارا مردان قوی پیکره باخ
ارشد لشکر آلوب حکم ولی اللهی
یخماقا کفری مجهّز ائده جنداللهی
.
.
مالکِ اشتر سرکرده ی مُلک غزوات
وئردی فرمان الینه حربه سین آلدی نفرات
اولدولار حملیه آماده اوجالدی صلوات
فاتح خیبر علی صدق و صفا چرخینه ماه
لشکر حقّیده سرکرده لره قیلدی نگاه
.
.
ایستدی هاشمیده حافظ شرعِ نبوی
عالی فرماندهیدی صاحب ایمان قوی
صولتین گورمیشیدی لشکریان اموی
زهد و تقویٰ الی زیبا ائلمیشدی یوزونی
دین اسلامه گوره وئرمیشیدی بیر گوزونی
.
.
مرد تاریخ جهان سوزلرین اظهار ائلدی
نقشه ی جنگی وئروب هاشمه هشیار ائلدی
حضرت امضانی وروب حکمه علمدار ائلدی
اوجالوب باشی گوروب ئوپدی علینون الینی
صف اعدانی یخا باغلادی محکم بئلینی
.
.
ایسته دی نیزه علَم باغلیا سردار امام
گَتدیلر نصب ائلدی تاپدی آت اوستونده مُقام
یار و انصار امیر عربه وئردی پیام
ایّهاالنّاس مقابلده شجاعتله دورون
لشکر معاویه کفاریدی شمشیر ورون
.
.
نور ایمانیله خوش حالوزه قلبوز دولودی
بو یولی که گئدوسوز عشقیله الله یولودی
هانسی قول یخسا یره کفری علینون قولودی
قالسا کیم زنده مسلّم اولاجاق پاک سرشت
گر شهید اولسا چکر حسرتین حورای بهشت
.
.
رو به روده دایانوب جنگوزه بو لشکر شوم
وئرّم اوچ مرتبه پرچمله سیزه رمز هجوم
گون افقدن کی چیخار باتمالیدی گوگده نجوم
قدرتوزدن بیلورم فرقه ی عدوان قاچاجاق
لشکر نوری گوروب لشکر شیطان قاچاجاق
.
.
حمله فرمانینی هاشم وئروب حق لشکرینه
ایتی شمشیرینی آلدی اوزیده اللرینه
لرزه دوشدی سپه بد سِیَرون پیکرینه
جنگ میدانینه آتلار قدم آتدی چاپاراق
دئدیلر اسلحه ی تیز لبه ال آپاراق
.
.
عمرو عاص هاشمه چوخ دقّتیله ائتدی نگاه
گوردی حمله ائلیوب باشدا شجاعتلی سپاه
لشکر زاده ی هنده دئدی اُول غرق گناه
من علیّ ابن ابی طالبی چوخدان تانورام
صاحب پرچمینی صاحب ایمان تانورام
.
.
توکولون سیزده الوزده هاموزون تیر و سنان
چالونوب طبل یریش لشکره گلدی هیجان
ایکی لشکر یتیشوب بیربیره قوپدی طوفان
باشلانوب عرصه ی میداندا بویوک جنگ و جدل
نیزه دی تیریدی ذوبیندی اولور ردّ و بدل
.
.
مالکِ اشتر ائدوب فرقه ی خونخواری فنا
پایگاهه قییدوب صاحب اوصاف و صفا
باخدیلار لشکر نوره ساری مردان خدا
گوردیلر پرچم هاشم حرکتدن دایانوب
مرتضا حالی همان واقعه دن چوخ دولانوب
.
.
یولّادی بیر نفری عرصیه سلطان نجف
گئتدی میدانه گئدوب یاره لی سرداره طرف
هاشمی گوردی اولوب خنجر برّانه هدف
آتون اوستونده اورک قانی سرشکه قاریشوب
قولّاری یوخدی علم سینیه محکم یاپیشوب
.
.
دئدی مولا بویورور پرچمون ائتمور حرکت
دئدی گئت عرض ائله ای منبع خیر و برکت
حرکت ایلیه بیلمز علمِ با عظمت
صف چکوب خنجری اللرده عدو یوللاریما
یتیش امدادیمه صدمه یتیشوب قوللاریما
.
.
قییدوب فوری فرستاده ی مولای جهان
محضرینده دایانوب آه چکوب ائتدی بیان
سنی امدادینه ایستر آپاروب هاشمی قان
قولی یوخدور یارادی پیکری باشداد ایاقا
نجه احواله دوشوبدور اوزون آگه سن آقا
.
.
آلیجی قوش کیمی امدادینه حضرت یتیشوب
گوردی قوللارینه میدانیده ضربت یتیشوب
دئدی هاشم نه گوزل حاصله نیّت یتیشوب
اوزونی آتدی آتین اوستن علی مقدمینه
صاحب اول عرض ائلدی دین مبین پرچمینه
.
.
آلون اطرافین علینون دئدیلر یاری ئولور
گورمسون چشم معاویّه علمداری ئولور
سئوینر گورسه دوشوب قولّاری سرداری ئولور
هاشمین اللری یوخ یاره لی عنقا کیمی دی
صورتین قان بزیوبدور گل حمرا کیمی دی
.
.
یا علی اوغلون اباالفضلیده سرلشکریدی
قوللاری دوشدی بدندن هدف خنجریدی
سینه ده پرچمی صاحب علمین گوزلریدی
وردیلار قانلی بیابانیده پیکان گوزونه
کیم چکوب سن بیلوسن گوزدن آخوب قان یوزونه
.
.
باشینه اندی عقاب اوسته آغیر آهن عمود
گه صاقا میل ایلدی گاهی صولا پاک وجود
باش یارا آلنی یارا دوره ده افواج عنود
قلم عاجزدی مصیبت لرینی شرح وئره
آلنینون تیرینی چکدی دوشوب عمامه یره
.
.
اوغلوون فکرینه اوغلی ئولن اوغلون قالدی
دیزی اوسته باشینی باشینون اوسته آلدی
ابن سعدین اوزی سرکرده لری ال چالدی
کیم واریدی آلا دورین شه احرارین آقا
گوردیلر یرده دوشوب قولسوز علمدارین آقا
.
.
گه دئدی قولّارون اولموش بدنوندن آرالی
گه دئدی اؤچولار آسوده قویالّار مارالی
گه دئدی اوغلوم ئولوب داغلیدی قلبیم یارالی
گه دئدی صحبت ائله قوی ائشیدوم سوزلرووی
گه دئدی سیلّم اگر اینجیمسه گوزلرووی
.
.
ای منیم عالَم عزّتده ایشیقلی قمرم
یخیلان وقته آتوندان یره سیندی کمریم
گوز تیکوب خیمه ده حتی یولووا صودامریم
میلون اولسا آپاریم من سنی یالقیزلاریما
آچا بیلسون گوزیوی آچ نظر ائت قیزلاریما
.
.
دئدی عهد ایلمیشم تابع فرمانون اولوم
آستانونده چاتوم عزته دربانون اولوم
منی اخیامه آپارما آقا قربانون اولوم
گرچه اخیاموه من گئتمگه حسرت چکرم
یوخدی سو تشنه لروندن ولی خجلت چکرم
.
.
قان دولوب صورت پُر نوروی گورمز بو گوزوم
هاچان اوپدوم الیوی اللروی دوتدوم ئوزوم
الیمی صورته چکدیم کی گوزللّندی یوزوم
اللریم یوخدی فلک بحر غمه غرق ائلیوب
الوی گُتگه ئوپوم ایندی زمان فرق ائلیوب
.
.
یاره دن پیکریمون صاف قالوب آیا هاراسی؟
قالما میداندا ویرور دشمنیمیز دل یاراسی
قویما اعدانون الینده قالا مشگون پاراسی
آپار اخیامه نشان وئر سارالان قیزلاریوا
ئولدی عباس دئنن تشنه قالان قیزلاریوا
.
.
ای«معزّی» پوزولوب غمدن حسین سیماسی
یارالانمیشدی وفا پرورینون اعضاسی
گئتمه دی خیمه لره ماه لقا عباسی
سرور تشنه لبون گوگلره افغانی چیخوب
ناگهان سس کسیلوب قارداشینون جانی چیخوب
.
- چهارشنبه
- 23
- مرداد
- 1398
- ساعت
- 9:55
- نوشته شده توسط
- ابوالفضل عابدی پور
- شاعر:
-
استاد یوسف معزی اردبیلی
ارسال دیدگاه