منی آغلادیر بو چولده
باشوین یاراسی قاسم
دیله گل دانیش اماندی
دیلوون فداسی قاسم
.
.
اوجادان منی چاغیردین باشیوا دینده ضربت
یخیلاندا تپراق اوسته ائده بیلمدیم حمایت
منی یاندیرور بو نسگیل سنی ئولدورور جراحت
گوزومون یاشی اولوبدی یاراوون دواسی قاسم
.
.
داغیدا خدای قاهر بو سپاهین اتفاقین
باشیوا ویروبلا یاره بیله شوب قانا دوداقین
سنی اینجیدیر جراحت یره سورتوسن ایاقین
عموون سونور چراغی یخیلیر سراسی قاسم
.
.
توکولوب قانین عذاره توتولوبدی مه جمالین
قره قرمیزی ایپک تک بویانوبدی خط و خالین
گوزی یاشلی باشین اوسته بئلیمی بوکور بو حالین
آزالوب یتشسون عرشه عموون صداسی قاسم
.
.
بو زمین کربلاده منیله جهاد ایدیبسن
علی اکبریم کیمین سن شهدا یولون گئدیبسن
هدفین ره خدادی سر مقصده یئتیبسن
ابدیّته چاتوپسان حسنین بالاسی قاسم
.
.
سن عزیز آل هاشم نه گوزل جلالتین وار
چوخ ادبلی نوجوانسان شرف و لیاقتین وار
آتام حیدرین بالاسی نسب و شجاعتین وار
ثمرِ دل حسن سن گوزومون ضیاسی قاسم
.
.
غم و غصه لر اولوبلار منه بو مکاندا یولداش
اورگیم گلوبدی درده توکورم عذاره قانیاش
دئیرم دوروب گیدیدوک منیله خیامه ای کاش
اوجالوبدی خیمه لرده باجیمون صداسی قاسم
.
.
سنه من خبر ویرنده عمل و شهادتیندن
ئولومی شیرین بیلوبسن عسلین حلاوتیندن
دئیرم هامی ایشیتسون ادب و لیاقتیندن
ادبستانین اولوبسان یخیلان هماسی قاسم
.
.
ائویمی یخوبدی دشمن یتشوب بو گون مرامه
دیزمین توانی یوخدی گونوزوم دونوبدی شامه
دورا بیلمورم آیاقه نئجه من گیدوم خیامه
قوتاروبدی کربلاده بدنین قواسی قاسم
.
.
بویوک اللهین اوزوندن آتاوا دیرلی پای سان
ادبیله معرفتده علی تک جوانه تای سان
شرفِ سپهر و گویده سن اوزون ایشقلی آی شان
بو جهاندا مجتبانین ائوی نین صفاسی قاسم
.
.
سوزووی یازاندا «هادی» اوز ئوینده آغلیبدی
اونون آه بی صداسی اوره گینی داغلیبدی
سوزونون باشین چکیبدی بو مقامه باغیبدی
دیله گل دانیش اماندی دیلوون فداسی قاسم
- چهارشنبه
- 23
- مرداد
- 1398
- ساعت
- 10:33
- نوشته شده توسط
- ابوالفضل عابدی پور
- شاعر:
-
تبریزی هادی سلطان محمدی
ارسال دیدگاه