باشیم اوسته قانلی قاتل
خنجر الده، من یارالی
باشیمی کسن امان سیز
لیک باش ویرن یارالی
.
.
اسدی تند باد محنت کربلا ده قوپدی طوفان
ابر تیره گون بوشالدی سو یرینه آخدی آلقان
باغبان خسته دلخون باغ و گلشن اولدی ویران
سنبل و سمن پریشان بلبل چمن یارالی
.
.
آلدیلار منی آرایه یاره یاره اوسته آلدیم
ناتوان اولوب عقابین بوینونا قولومی سالدیم
قالمادی بدنده قانیم ضعفدن ایله سارالدیم
باش آچوب بوچولده گویا شاخ نسترن یارالی
.
.
هاردادور شه غریبان باشیمی کناره آلسون
سایه سینده ابر رحمت باشیم اوسته سایه سالسون
قویماسون یارالی جسمیم ایستی قوملار اوسته قالسون
لخته لخته قان ایچینده یرده بیکفن یارالی
.
.
خوشدلم که دست ظلمون کشته جفاسی اولدوم
یاره لرده یاری گوردوم عاشق لقاسی اولدوم
باشیوه دونوم نه یاخشی باشیوین فداسی اولدوم
وجه احسنیله اولدی صورت حسن یارالی
.
.
رسمدور تیز اولدورللر اوخ دگوب دوشن شکاری
چوخ گورر گوزونده صیاد بیر دقیقه انتظاری
ایسترم بابام گلیدی بیر باخوب گوریدی باری
قانلی آستین صیاد آهوی ختن یارالی
.
.
بسکه قان آخوب باشیمدان گوز ایوین بوتون دوتوب قان
نور آفتابه یر یوخ تار اولوب گوزیمه مژگان
سدّ اولوب نفس یولوندا خاک تیره گرد میدان
اوددوتوب دلیم دوداقیم اَل ایاق بدن یارالی
.
.
پای بوسیوه واریمدور بو گوگلده چوخ علاقه
نیلیوم که ممکن اولماز من دورانمیرام ایاقه
سن تواضع ایله بابا گل که جان یتوب دوداقه
نخله امیدیم آرتوق اولدی ریشه کن یارالی
.
.
سن بابا اوزون بولورسن زخمدار اولان سو ایستر
گل قوری دوداقلاروندا نهر سلسبیلی گوستر
زانوی شریفون ایله بو یارلی باشه بستر
فیض آلوم نفسلروندن صون نفسده من یارالی
.
.
هر یارالی گون ایونده قالسا چاره سیز سیزیلدار
زخم نیزه جان ستاندور اوخ یاراسی چوخ سیزیلدار
جان چخاندا خنجر آغلار قان آخاندا اوخ سیزیلدار
حالیمی گلوب گوریدون ای شه زَمَن یارالی
.
.
اوخ اوتوردی سینم اوسته آچدی غنچه تک یاراسی
گُل گُل اوزره دوزدی ووردی جسمیمه بَزَک یاراسی
وار آنامدامندن آرتوق بیر بویوک اورک یاراسی
آغلاسا اورکدن آغلار جمله مرد و زن یارالی
.
.
ایسترم بو دم یانیمدا مهربان آنام اولیدی
باشیم اوسته باش آچیدی سس چکوب ساچین یولیدی
آغلیوب توکیدی قانیاش قانیله بوچول دولیدی
منده ال ایاق چالیدیم قان ایچینده تن یارالی
.
.
سویلیون غریب آناما اکبر جوانون ئولدی
تشنه لب یارالی یالقوز جانی چخدی جانون ئولدی
ظلمیلن بِلون بوکولدی طاقت و توانون ئولدی
آغلا بی شکایت آغلا آغلا بی سخن یارالی
.
.
ئوپدی یا حسین«هندی»خاک درگهون دوباره
پیر اولوب شفاعت ایستر دردینه سن ایله چاره
الده دفتر مصیبت یوزقویوب گیدر مزاره
نغمه نغمهٔ حسینی نظم و سینه زن یارالی
.
.
- چهارشنبه
- 23
- مرداد
- 1398
- ساعت
- 10:51
- نوشته شده توسط
- ابوالفضل عابدی پور
- شاعر:
-
مرحوم هندی تبریزی
ارسال دیدگاه