یتوبدی وقت شهادت باجی خداحافظ
بو سن بو آل رسالت باجی خداحافظ
.
زوال وقتی اولور چون شهادت امری تمام
گللّه خیمه لره اشقیای کوفه و شام
.
وئرلّه لشگره فرمان سَنان و شمر لعین
وورالّا خیمه و خرگاهیمه شرارۀ کین
.
اَلولاناندا چیخون خیمه دن کناره باجی
هامی چوله داغیلون یوز قویون فراره باجی
.
اؤزون او حالده بیمارین اول پرستاری
چکوب کناره چک اوتدان کناره بیماری
.
طناب ظلمه سیزی باغلیوب ائده لّر اسیر
ائدر مفارقتیم اهل بیتیمه تأثیر
.
خصوص نازلی سکینم منه چوخ الفتی وار
اونا بولورسن اؤزون قلبیمون محبتی وار
.
ائدن زماندا فراقیمده ناله و زاری
آلوب قوجاقه اؤزون وئر او طفله دلداری
.
دئسه بابام هانی بس هاردادور علی اکبر
سؤله ائدوبدی آتان قارداشون حجازه سفر
.
منی خیاله سالوب آغلیاندا وئر تسکین
دئمه یتیم اولوبسان سولوبدی گل رنگین
.
خرابه ده گجه لر آج سوسوز قوری یرده
صباحه تک ائده جاق ناله هجر اکبرده
.
او قدر گوشۀ ویرانه ده بو طفل یتیم
آتا دیر ائدر آخرده جانینی تسلیم
.
غریب عیالیمه مندن صورا پرستار اول
گئدونجه شامه هامی اهل بیته غمخوار اول
.
دگوبدی بیربیره بو سؤزده عترت اطهار
آلوب آرایه او سلطانی خورداجا بالالار
.
یاپیشدی دامنینه عرض ائدوب سکینهٔ زار
اماندی هر یره گتسن منی یانونجا آپار
.
منی آیرما اؤزوندن قالانمارام سنسیز
قرار خیمه ده سنسیز دوتانمارام هرگز
.
اگرچه گلمز الیمدن ائدم سنه امداد
او قدر عجز ائده بولّم که رحم ائدر جلّاد
.
اگر سنون قاباقوندا وورانمارام شمشیر
ولی باشارّام ائدم جانیمی نشانۀ تیر
.
دوشوب یانونجا پیاده سوار تک گئدرم
سنون یولوندا بابا جانیمی نثار ائدرم
.
دالینجا ئولماقا گتسن قاچا قاچا گلّم
که بیر دقیقه سنی گورمسم یقین ئولّم
.
منیم اولوبدی یریم دائماً قوجاقوندا
نه نوع تاب ائده بولّم غم فراقوندا
.
قسم حیاتوه کیم مایۀ حیاتیمدور
الیمده دور اتگون باعث نجاتیمدور
.
محالیدور بوراخام من بو دامنون گئده سن
مگر انوب یره آتدان بو طفلی شاد ائده سن
.
زمانه یاندوراجاق آتش فراقه منی
قرار سابقیله بیرده آل قوجاقه منی
.
ترحّم ایله گوزومدن آخان بو گؤزیاشیما
او مرحمت الوی بیرجه چک منیم باشیما
.
او ظلمی کیم ائده جاق شمر دون عیاندی منه
یتیمیلیق غمی هر دردیدن گراندی منه
.
گتور دوداقلاریوی قوی بو تشنه لبلریمه
یتیملر کیمی ال چک باشیما تل لریمه
.
نقدر لطف ائده سن بو رقیّه یه یریدور
زمان عزّتیمین چون زمان آخریدور
.
زمان عزّتیمی ذلّته مبدّل ائدر
منه بلالری سندن صورا محوّل ائدر
.
نه اینکه باشیمه کیمسه وفادن ال چکمز
ئولونجه شمر ستمگر جفادن ال چکمز
.
غرض بالالارین اول شاه او چولده ترک ائتدی
قتال لشگر اشراره قصد ائدوب گتدی
.
- چهارشنبه
- 23
- مرداد
- 1398
- ساعت
- 11:29
- نوشته شده توسط
- ابوالفضل عابدی پور
ارسال دیدگاه