بیزه حقدن حسین ابن علی تک یادگار اولماز
نظام عشقه ایمانه حسین تک پاسدار اولماز
بیری یوز ایل ایده طاعت حسینی بیلمیه مولا
او طاعات و عبادتدن رضا پروردگار اولماز
حسینه کیم مرید اولسا جهاندا سر فراز ایلر
اولار پاینده اعمالی خدادن شرمسار اولماز
اون اوچ معصومیلر بیرده حسین تک بیر کس عالمده
مقرب اولماز اللها عزیز کردگار اولماز
حسینون پاک آدیلا کیم انیس اولسا حسینچیدور
حسینچی معنوی بیر آد دی معنادن کنار اولماز
حسینه آغلیان مؤمن کور اولسا هر ایکی گوزدن
باخار معنا گوزیلن دیده معناسی تار اولماز
بو معنایه اولار عارف او کس کی واردی تقواسی
حسینچی نفسینه غالب اولار بی بند و بار اولماز
حسینون نوکری نوکر لیگین دنیا ایلن قاتماز
اوزون تسلیم ایدیب هر بی سر و پایه دچار اولماز
حسین آزاده مولادی ضلالتدن مبرادی
اونا کیم دوز غلام اولسا دچار ننگ و عار اولماز
دچار ننگ اولان انسان ایر باش کافره گبره
هر اوباشه دیر قربان اوزی صاحب وقار اولماز
اولان صاحب وقار انسان فقط اللها بل باغلار
اگر شاهلار حضورینده دایانسا جان نثار اولماز
حسینچیلر بیلولر خاندی سلطاندی گدر قالماز
بو بش گونلوک فنا دنیاده قدرت بر قرار اولماز
چکر عقبا ترازوسی عمل مثقالین انسانه
عجل حکمی گلن ساعتده سیم و زر ایار الماز
قویون یاد ایلیوم رحمتلیگ انوردن کی یازمیشدی
قضاوت ایلیَن عادلدی حکمیندن فرار الماز
ائو گونکی کوهِ محکملر آچیلمیش پنبیه بنذر
سلاطین جهانگیرون الینده اقتدار الماز
جهنم سسلنر نعره چکر ائوز طعمه سین ایستر
موجه الماسا عذرون قبول اعتذار الماز
او کسلرکی ارادتمندیدور تابع دی مولایه
اولار آزاده انساندور مسلم اهل نار الماز
مطلا تخت و تاجیلن گداده شاهلارا اوخشار
اوزون انسان بیلن سلطان گدالردن کنار اولماز
باشا تاج آختاران بیلسون کی ایماندور باشین تاجی
باشا اندیشه لازیمدور ریاست پایدار اولماز
ملل سلطانلاری بیلسون حسیندور رجعتین شاهی
یتیشمز گردینه شاهلار حسینه همقطار اولماز
حسین ایلر حکومت عالمه رجعت زمانینده
گورن ائول شاهی عرض ایلر بله بیر شهریار اولماز
اونا شاهلار اولا قربان کی قربان اولدی اللها
چون الدی لاشریک عبدی وجودیندن کرار اولماز
اونون شأنینده دوشموش حیرته کان و مکان یکسر
بشر ذهنینده شأنی جایگاهی آشکار اولماز
بشر بیر قطره دور دریا یاراتمش خالق اول شاهی
او انسان تک هچ انسان خلقتینده شاهکار اولماز
چکوب میزانه عظما بیر غمیلن خالق ائول شاهی
گوروب زینب کیمین هچ کس اوشاهه غمگسار اولماز
آدی زینب لقب اولیا اوزی حل ایلین مشکل
باش اگمیور قوم ظلامه بله روح وقار اولماز
حسینون باشینی گورجک ولی نیزه فرازینده
دیر گوردوم بو غوغاده سنی منده قرار اولماز
گرک عاشقده اولسون بیر نشان معشوقیدن زینب
کیمین هچ کس حسینه عاشق دیوانه وار اولماز
بو زینب تک هچ عاشق عرصه ده شور آفرین اولماز
بو باش تک نیزه نین باشینده بیر باش تک سوار اولماز
الوبدور غم شریکی زینب کبری حسینیلن
ایکی عاشقدی بیر عظما غمی تکرار اولار ؟ اولماز
او عاشق ایلیور قرآن تلاوت نیزه باشینده
بو عاشقده یاریب باشین دیور قارداش قرار اولماز
منیم باشیم قالا سالم سنون باشین ولی مذبوح
سنه ای دین چراغی یانماسا کیم دینمدار اولماز
باشیندا قان گورور زینب باشیندان قان توکور زینب
سنی مولا بیلور زینب سنون تک دینه یار اولماز
باشین نیزه فرازینده ایله بیر فیض اکملدور
باخا دائم او تمثاله باجین زینب خمار اولماز
سنیلن مستیدور زینب سنه فخر ایلیور زینب
سنون شورین دمادمدور بله شور و شرار اولماز
اولوبسان نیزه اوباشینده قرآنیلن مأنوس
هچ عاشق محضر یاره سنون تک رهسپار اولماز
(حسن) گر دوشمسن عشق حسینون دامینه بیل کی
رسول ترکلر مثلی بو سینن داغدار اولماز
- شنبه
- 26
- مرداد
- 1398
- ساعت
- 10:59
- نوشته شده توسط
- ابوالفضل عابدی پور
- شاعر:
-
حسنعلی بالایی
ارسال دیدگاه