آتدان دوشنده قاسم گل پیرهن یره
ائتدی روانه گوز یاشینی پنج تن یره
.
زهرا و مرتضی و حسن جدی مصطفی
باطنده نازل اولدیلا قاسم دوشن یره
.
ظاهرده گلدی خامس آل عبا حسین
آل عبا یغیشدی او بیت الحزن یره
.
صدقیله قاسمه دوتا هر کیم عزا یقین
بو پنج تن گلر او عزادار ئولن یره
.
آل عبایه سوگلیدور چون بو نوجوان
آل عبا گیدر بو جوانی سووَن یره
.
یوخ احتیاج ادِلَّه و اثباته پنج تن
ایندی یقین گلوبدیله بو انجمن یره
.
صاحب عزا بو رسمیدی آغلار گوزی سووَر
زهرا گلر مُحبّلر اشکین توکن یره
.
گوز یاشلارین ذخیره ایدر روز محشره
قویماز سرشک تر توکوله دیده دن یره
.
بو بزمیده علی اوتوروب، چوخ مودب اول
باخما حقارتیله علی اگلشن یره
.
سال یادیوه او وقتی که صد پاره جسمیله
آتدان یخیلدی قاسم گلگون کفن یره
.
سسلندی ای عمو ئولورم گل هراییمه
قربان یارالی جانیم عمو سن گلن یره
.
آلدی سسین خیامیده گلدی غریب امام
دوشموش یارالی گوردی او گول پیرهن یره
.
فریاد او وقتدن که حسین تاپدی قاسمی
دلسیز دوشوب نه گوردی او شیرین سخن یره
.
ماهی کیمی چالور ال ایاق قانلو دجله ده
سورتور گوزل یوزین او سوسوز جان ویره
.
قارداش بالاسین ایله گوروب دلدن اودلانوب
آتدان اوزون سالوب او شه ممتحن یره
.
گوردی شکار ایدوبدی خطا دیده اوچیلار
دلسیز دوشوب مثال غزال ختن یره
.
میدانی قانلو جسمی ایدوب رشک گلستان
گویا توکوبله یاسمن و نسترن یره
.
خنجرلریله قطعه به قطعه اولوب بدن
پاشیده دور دیرسن عقیق یمین یره
.
اول سرو بوستانِ بتولی جفائیله
یخمیش یارالی دسته ی زاغ و زغن یره
.
الوان اولوبدی قزمزی قانیله پیکری
اوراق لاله تک توکولوب بیر چمن یره
.
خونین شفقده ماه سپهر حسن قالوب
قانلو بولوددا دوشموش او وجه الحسن یره
.
قان دجله سینده سنگ جفادن حصار وار
گویا که داش توکوبدی گلن هر گیدن یره
.
گلمز یارا شماره نجوم سپهر تک
دوشموش بیر آسمان تک او سیمین بدن یره
.
باشی آخوب بوغاز گورونور قرص ماه تک
رخشاندی نور بخشدی سیب ذَقَن یره(1)
.
بلبل دانشدیروب گلینی گوردی دینموری
خندان دوشوب یوز اوسته او غنچه دهن یره
.
یردن گوتوردی قانلو باشین باسدی باغرینا
قویدی یوزین او سینه ده اوخلار تیکن یره
.
آلدی قوجاقه نعشینی حمل خیام ایده
قویدی دوباره یأسیله شاه زمن یره
.
اشکیم مجال ویرموری عرض ایدوم علتین
بیرده گوتوردی قویدی دوباره ندن یره
.
چوخدور یاراسی گوردی بدن قطعه قطعه دور
قان چشمه سی رواندی چو سیل دمن یره(2)
.
یا اینکه شه ایشیتدی امام حسن سسین
قویدی اوغول جنازه سینی تازه دن یره
.
آخر گوتوردی سینه سینه باسدی جسمینی
حمل ایلدی شبیه پیغمبر دوشن یره
.
چوخ زحمتیله گتدی خیامه جنازه سین
جمع اولدی دلده ناله حریم اگلشن یره
.
آلدی آرایه اهل حرم قانلو پیکری
گوز یاشی توکدی آل شه ممتحن یره
.
مجروح صیدی گورسه آنا آنّینی ئوپر
جانیم فدا الهی سریه ئوپن یره
.
آلنی گوروب یارالیدی ئوپدی بوغازینی
قویدی سوسوز دوداقینی خنجر بیچن یره
.
(1) ذقن = چانه؛ زنخدان
(2)دمن = دشت
- یکشنبه
- 27
- مرداد
- 1398
- ساعت
- 13:48
- نوشته شده توسط
- ابوالفضل عابدی پور
- شاعر:
-
مرحوم حسین شانی تبریزی
ارسال دیدگاه