بیر بالا عمه من کیمی
دردیله سازش ایلمز
دردیم اودی بو شامیده
بیر گجه کاهش ایلمز
.
.
تا یوزومه فلک منیم
باب امیدی باغلادی
پوزدی ایله جلالیمی
حالیمه دشمن آغلادی
شعلۀ نار هجریله
یاره لی قلبی داغلادی
دلده بو سوز داغ تک
هیچ یارا سوزش ایلمز
.
.
بیر قزین الدن عمه جان
گیتسه آتاسی قارداشی
قانه سزادی من کیمی
دونسه گوزونده گوز یاشی
بختی قرا اولوب دوشر
چوخلی بلالره باشی
بیر ده محبتین گونی
فرقته تابش ایلمز
.
.
آیریلرب ائل قبیله دن
من که آرالی اولموشام
خرداجا سنّیله بیله
باشی بلالی اولموشام
من بولورم آتام ئولوب
یاسلی عزالی اولموشان
گیزلدور عمداً عمه لر
شرحی گزارش ایلمز
.
.
باطن شخص ظاهره
رسمیدی امتحان ویرور
سن کیمی صبر صاحبه
موج بلا تکان ویرور
سن دئموسن ولیک ایش
اؤز اؤزونی نشان ویرور
هیچ کیم آتالی بر قیزا
بیله نوازش ایلمز
.
.
چوخلارین عزتین بدل
ذلته چرخ دون ائدیب
توش ایلیوب بلالره
محنتینی فزون ائدیب
چوخ دله داغ غم چکوب
ظلمله لاله گون ائدیب
طالعه باخ منیم کیمی
هیچ کیمه گردش ایلمز
.
.
عمه اگر منیم بابام
کعبیه ایلیوب سفر
بس نیه نه اؤزی گلور
نه بیزه گوندرور خبر
بیر بیله مدتی سفر
ایلمیش اولسا بیر نفر
دربدر اهل بیتینه
یوخسا سفارش ایلمز
.
.
باشدان ایاقه بی سبب
اشکِ تره بویانمورام
شام و سحر سپند تک
نار غمیله یانمورام
اکبریمون مسافرت
ایلماقین اینانمورام
طول سفر ایدن مگر
نامه نگارش ایلمز
.
.
بولموری اکبریم مگر
نسگلینی رقیّه نین
مشگلی وار گلوب آچا
مشگلینی رقیّه نین
شاد ایلیه خرابه ده
تا دلینی رقیّه نین
حل اولا امر دل یقین
اؤزگه گشایش ایلمز
.
.
یالوارورام گجه گونوز
باد صبایه عمّه جان
بیر گیجه تا یولون سالا
کربُ بلایه عمّه جان
اکبریمه دئسون که گل
شامه عزایه عمّه جان
یوخسا یتیمه بیر باجی
قارداشا خواهش ایلمز
.
.
سالک راه حق گرک
کسب ریاضت ایلیه
لازمه دور اسیر اولان
رنجیله عادت ایلیه
کیمدی منیم کیمی ولی
دردیله الفت ایلیه
بستری خاک و خشت بیر
شه قزی بالش ایلمز
.
.
عمّه روادی غصّه دن
گل کیمی عارضیم سولا
هر گلن اینجیدوب دوگه
گوزلریم اشگیله دولا
خردا اوشاقه ظلم ائدن
هر نجه سنگدل اولا
زخم ایدر ایتمسه یقین
ظلمونی فاحش ایلمز
.
.
سالدی منی ایاقیدن
دلده کی رنجیله تعب
اینجمیشم یورولموشام
ائتدی مریضه تاب و تب
ایله دعا رقیّه نی
وقت نماز نصف شب
سن کیمی عمّه خالقه
کیمسه نیایش ایلمز
.
.
حسرتیله گیجه گونوز
یولّارا گوزلریم باخار
اکبرین آیریلیق غمی
قلبیمی یاندروب یاخار
اوندا که سسلرم علی
عارضه اشکِ تر آخار
فصل بهاریده بولود
هیچ بیله بارش ایلمز
.
.
عالم شعر و شاعری
عشق و محبت اوسته دور
بعضلری مجازی دور
بعضی حقیقت اوسته دور
عشق #شعاع حسینه دور
نیتی خدمت اوسته دور
هر نه او شه سویه سویر
غیره ستایش ایلمز
- دوشنبه
- 28
- مرداد
- 1398
- ساعت
- 15:27
- نوشته شده توسط
- ابوالفضل عابدی پور
- شاعر:
-
حاج غلامعلی شعاع
ارسال دیدگاه