باشیمه دوشدی گنه شوق حرم
ایسته زوارین اولوم یا ذوالکرم
ایلین عشقی مسلمانه عطا
عشق اولا سن کیمی مولایه فدا
اولماسا هرکیمده عشقیندن اثر
طاعتی هر قدر اولا ورمز ثمر
آیه طتهیره خوش ممدوح اولان
کربلاده تشنه لب مذبوح اولان
دینه ایمانه ویرن قانی بقا
کربلاده چوخ بلایه مبتلا
صبح عاشوراده کی باشلاندی جنگ
کار و زاره گلدیلر گردان و هنگ
یولادون میدانه اول اکبری
خلقأ و خلقأ رسوله بنذری
ایله سون الگو نجه شاهلار سنی
یانماسون تا کی عدالت خرمنی
گلمیوب دنیایه سن تک شهریار
قالدی دنیا گوزلری سنسیز خمار
سوره قرآن مثالی اکبری
آیه آیه بولدی اعدا خنجری
بو محندن اولدی قران سوگوار
نینه سین اشرار الیندن کردگار
دیلرینده ذکر حی لامکان
الریندن باغری قان صاحب زمان
هر اوغول داغی آتا قدین ایر
اکبرین بیر زلفی دنیایه دیر
اکبرین دردی ایله اولدی چتین
نعشی اوسته گتدی دیزدن طاغتین
باتسا عالم ماتمه واردور یری
آغلادی احوالوه جن و پری
بیلمورم اوندا نه لر قیلدون بیان
روضه یازدم بنده در حد توان
شاید اوندا سسلدون ای وای اوغول
باشوون اوسته منه ویر های اوغول
هانسی ظالم باشووی یاردی بالا
آغلاما الله بیزه یاردی بالا
ای اولان مولا علی تک رستگار
ایلورم سن تک جوانه افتخار
یوخدی بو اشراریده ذره حیا
کول بو دنیا باشینه سندن سورا
هجرووه یثروبده صغرا آغلیور
سن کیمین جانبازه دنیا آغلیور
یوخ بو دنیاده سنه همتا علی
هجرووه دوزسون نجه لیلا علی
گوللریلن قبروون داشین بزر
عشقوه مجنون اولوب چوللر گزر
بو سخن ذکر (حسن) اولدی مدام
درگهونده قوی اولوم مولا غلام
لعن اولا اول ضد قرآن لشگره
ظلم ایدنلر عترت پیغمبره
- چهارشنبه
- 20
- شهریور
- 1398
- ساعت
- 12:13
- نوشته شده توسط
- ابوالفضل عابدی پور
- شاعر:
-
حسنعلی بالایی
ارسال دیدگاه