کوفه ده زهرا قیزی محشر نمایان ایلدی
باشلادی بیر ایله خطبه خلقی حیران ایلدی
استقامتله او دم صدّیقۀ کبری قیزی
اوج همّتده آچوب پرچم شه بطحا قیزی
ایتدی اوّل باشدا محکم معجرین زهرا قیزی
آی کیمی گون صورتین ابر آتدا پنهان ایلدی
دُر نثار ایتسون حیانین با ادب گنجینه سی
باشلیوب بیر خطبه زهرا قلبینون آئینه سی
آل سفیانین او دم تعطیل اولوب کابینه سی
حقّ و حقّانیّتی دنیایه اعلان ایلدی
گوردی کوفه ازدحامین زینب والا مقام
سسلنوبدور اُسکُتوا، آیا ندور بو ازدحام
قطع اولوب سسلر، دوشوب سسدن جرسلرده تمام
حیدر کرّار گویا عزم میدان ایلدی
بیر شجاعت گوستروب اول دمده دخت بوتراب
کوفه نین وضعین دگیشدی زینب علیا جناب
دگدی کوفه بیر بیره باشلاندی شور و انقلاب
بو وقایع آل سفیانی پشیمان ایلدی
کوفه ده ظاهر اولوبدور صولت شیرخدا
بیر بیره سویلوب گلوب یوخسا علیّ المرتضی
کیمدی بو محملده سالموش عالمه شور و نوا
نطقیله بنیان ظلمی بیله ویران ایلدی
نوری ظلمتده گورن سویلوب گونوزدی شبدی بو
بو جسارتده اسیر اولماز عجب مطلبدی بو
واضح اولدی خلقه تا زهرا قیزی زینبدی بو
عشقینی تصدیق اهل کون و امکان ایلدی
زینبیکه درس عشقی مرتضادن مشق آلا
بیر وجودیکه اونی باشدان ایاقه عشق آلا
کیم شهادت ایستسه اوندان گرک سرمشق آلا
کیم دیر عشقینده زینب ذرّه نقصان ایلدی
ایستدی گفتاریله شخصیّتین ویرسون نشان
گلشن زهراده سویلوب بیر گلم عنبرفشان
زینبم جدّیم پیمبر، کیمده وار بو عزّ و شان
خارجی آد قویدی قوم دون نه عنوان ایلدی
دین یولوندا دستگیرم خوشدی خون دل ییم
اگنیمه رخت اسارت دینیم امر ایلوب گیم
ناقه اوسته سیزلره هر یرده درس دین دیم
چون منه بو حکم شرعی حیّ رحمان ایلدی
گوهرم گنجینۀ عصمتده من زهرا روش
ایلیوب زهرا منی بو گوندن اوتری پرورش
ایلیم اثبات حق ای کوفیان بدمنش
هانسی بیر ملّت امامین قانه غلطان ایلدی
اول کسوک باش که گورورسوز شاه عطشان باشیدور
مصطفی دلبندی زهرا جسمینه جان باشیدور
هیکل توحیددور معنای قرآن باشیدور
اصل قرآن اوسته مظلوم اهل قرآن ایلدی
لعل لب آچدی او دمده شاه عطشان نیزه ده
خلقی تبلیغات ایدوردی دینه هر آن نیزه ده
باشلیوبدور بیر گوزل صوتیله قرآن نیزه ده
ناطق قرآن سسی دنیانی حیران ایلدی
گوردولر آیات حقّی حجّت یزدان اوخور
بیر بیره سویلوب کسوک باش گور نجه قرآن اوخور
خارجی اولسا ندن بس آیۀ سبحان اوخور؟
بو حسیندور جان و مالین دینه قربان ایلدی
گوردی زینب صوتیله قرآن اوخور شاه زمن
سسلنوب به به بو دلکش صوتیوین قربانی من
ایتماقا قارداش تماشا صف چکوبلر مرد و زن
خلقه آندور اهل کین ظلمینده طغیان ایلدی
سن کسوک باشیله من قول باغلی ای شاه حجاز
ایلیاق هر نحویلن اسلام و دینی سرفراز
سن حسین قرآن اوخی من خطبه اولسون کشف راز
بولسون عالم بیزلره ظلم آل سفیان ایلدی
نیزه ده باخدی گوروب عشقین قطاری لنگ اولوب
درد و غمدن وسعت دنیا گوزونده تنگ اولوب
ووردی باشین محمله قارداشیله همرنگ اولوب
دلده کی عشقین او گون دنیایه اعلان ایلدی
باجی قارداش دین یولوندا ایلیوبلر اتّحاد
حقّی اثبات ایتدیلر رسوا اولوب اهل عناد
بولدولر دینین ایوین ویران ایدوب ابن زیاد
بو اسفلی حاله دشمنلرده افغان ایلدی
- پنج شنبه
- 21
- شهریور
- 1398
- ساعت
- 10:55
- نوشته شده توسط
- علیرضا گودرزی
ارسال دیدگاه