یاخشی هدفه دگدی بو قرآن اوخی قارداش
قربان یارالی باشوه قرآن اوخی قارداش
قرآن اوخی، ویر کوفه لیلر فکرینه تغییر
بُلسونله بیزه نازل اولوب آیۀ تطهیر
ای سنگ ستمله سینان آئینۀ رحمان
اولسون او لب لعله فدا زینب نالان
بو کوفه نین اهلی بیزی بولمولّه مسلمان
قرآنیله دیندن بیزی بیگانه بولولّر
گه کف چالوب اشرار بیزه گاه گولولّر
گل نطقه دانیش قدرت یکتانی نشان ویر
دل مرده لره معجز عیسانی نشان ویر
قرآنی دانان ملّته قرآنی نشان ویر
قرآن اوخی تا بلکه یاتان ملّت اویانسون
تا واردی جهان حقّیله باطل آرالانسون
ای قولی کیمی فعلی اولان حجّت مطلق
وی قانی ویرن مصحفین آیاتینه رونق
قرآن اوخی بو مسئله نی ایله محقّق
اولماز کسیلن باشدا دانیشماقلیقا امکان
حقّ اولماسا بیر باش اوخوماز نیزه ده قرآن
به به نه گوزل وقتیده ای میر هدایت
ایتدون بو قرا رختلره لطف و عنایت
قرآن اوخودون تا بوله قارداش بو جماعت
دین اوسته سنی اُلدوروب اشرار ستمگر
سن دینه فداسن بیزوق اولاد پیمبر
قرآن اوخی گه قدرتون اعدایه بولوندور
گاهی گوزآچوب خورداجا قیزلاریوی دیندور
بو کوفه لیلرده بو نه مذهب بو نه دیندور؟
ایتمولّه ترحّم کسیلن بیر باشا قارداش
قرآن اوخویان باشی باسولّار داشا قارداش
یاللعجب اعجازیوی گورمور بو جماعت
قرآن اوخودوقجا، بولار ایلولّه جسارت
بو طعن و شماتتلره ایتمولّه کفایت
اعجازیوی گوردوقجا عِناد اوسته دورولّار
قارداشی ئولن باجیلارا قمچی وورولّار
نیلوم کیمه من ایلیوم اوز دردیمی اظهار
دورمده منیم نه کمکیم واردی نه غمخوار
بیر عدّه فقط قاره گین اوغلی اُلن وار
یالقوزدی کمکسیزدی باجون، بیر کسی یوخدی
سالما نظروندن بولوسن غصّه سی چوخدی
شاها بو حسینی سنه خادمدی عزادار
باخماز مگر اوز نوکرینه شاه وفادار
چوخدور گنهیم سنده گینه لیک گوزوم وار
سالما منی گوزدن سن اگر ایتسن اراده
ایتمز منی شرمنده خدا روز جزاده
- پنج شنبه
- 21
- شهریور
- 1398
- ساعت
- 11:25
- نوشته شده توسط
- علیرضا گودرزی
- شاعر:
-
سعدی زمان سیدرضا حسینی
ارسال دیدگاه