کیمسن ای باش معجز عیسانی گوستردین منه
قانلی صورتله بوگون معنانی گوستردین منه
.
بیر دانش منله ندن منحور اولوبدرور حنجرون
یاره لی باش باشیوه قوربان هانی بس پیکرون
نیزه لر اوسته سنیلن همسفردور لشگرون
جلوه عشقونده سن یحیانی گوستردین منه
.
کیمسن ای باش نیزه اوسته اهل عشقه راهسن
آسمان عشقیده قانه بویانمش ماهسن
کیمدی بو قاره گینلر اونلارا همراهسن
یاندی قلبیم خرداجا طفلانی گوستردین منه
.
کیمسن ای مظلوم اولن قانلی باشون اعجاز ایدور
جلوه ائیلور نیزده عشاقه کشف راز ایدور
سنله هر کیم همسفردور عرش و فرشه ناز ائدور
وصل یاره چاتماقا میزانی گوستردین منه
.
بیر دانیش منله ایدیر هر قلبی روشن سوزلرون
آیه آیه ایلوری قرانی معنی گوزلرون
باش کسن قومه اسیر اولموش ندن گل اوزلرون
تا بیلیم کیمسن بله دورانی گوستردین منه
.
درک ایده بولمز جلال و شوکتین هر بیر گورن
سن کلیمه طور سیناده گورنموش جلوه سن
ائتمدون نفرین بو بد طینت لره آیا ندن
سری وار بو رحمت شایانی گوستردین منه
.
کشتنی عشقون منی چکدی بلادن ساحله
آزدی ویرسه م باشیمی عشقون بهاسینده صله
ایندی فردوس برین حسرت چکور بو منزله
رمز و راز عالم امکانی گوستردین منه
.
خواب غفلتدن اویاندیم لطفویله من بئله
راضی اولسا گر حرملر ائتمسه سندن گله
ساخلارام باشین قوناق تا دوشمسون الدن اله
ابتدای راهیده پایانی گوستردین منه
.
من باش اگدیم باشیوه سندن اطاعت ایلرم
دینیوی ایتدیم قبول حقه شهادت ایلرم
هم سنه هم اهلبیته قالسا خدمت ایلرم
گول یوزونده جنت الاعلانی گوستردین منه
.
نه یوزیله محشره آیا گلر بس امتون
دینینی دنیایه ساتدی بیلمدی اوز قیمتون
باشیوی تشنه کسیب آواره ایتدی عترتون
ظلم و جور امت نادانی گوستردین منه
.
گر بیزه قالسیدی عیسی نبی دن یادگار
ساخلیاردوخ گوزلر اوسته با کمال افتخار
اولدوروب پیغمبرین اوغولون بو امت آشکار
قدرت سیم و زر و دنیانی گوستردین منه
.
مرهمیم ده اولماسا سیلم جمالوندن قانی
اولمیوب هیچ یئرده گویا استراحت امکانی
قال بو منزلده منه مهمان سنی عیسا جانی
عاشق ایتدون بیر باخیشدا جانی گوستردین منه
.
قویسالا هر نه واریم وئرم سنی تا ساخلیام
هر گئجه شام عزا قوررام دویونجا آغلیام
گر چه سایسیزدی یاران امکانی یوخدی باغلیام
زخم عشقه مرهم و درمانی گوستردین منه
.
کاش اولیدیم سنله ای شه کربلای عشقده
بذل ایدیم جانیمی منده منای عشقده
باش و جان لازم دگل الا هوای عشقده
بزم انس و خلوت جانانی گوستردین منه
.
بو گئجه سنلن تاپوبدی منزلیم عالی صفا
شوکری وار چوخ چوخ کی من اولدوم سنیلن آشنا
سن آنان جانی منه قول شفاعت ویر اقا
اختیار عالم امکانی گوستردین منه
.
راهبی گوردی تحیرده امام عالمین
نطقه گلدی تا الین دوتسون اونون حبل المتین
من شهنشاه حجازم زاده زهرا حسین
عشقوین وار هر قدر امکانی گوستردین منه
.
سن منی راهب بلایه توش اولانلاردان سوروش
کربلادن باغری قانیله دولانلادان سوروش
گل یوزی دوشمن جفاسیندن سولانلاردان سوروش
سن بوگون قلبینده کی ایمانی گوستردین منه
- یکشنبه
- 24
- شهریور
- 1398
- ساعت
- 9:57
- نوشته شده توسط
- ابوالفضل عابدی پور
- شاعر:
-
محمد هوشمند
ارسال دیدگاه