هرنه بلا یولوندا علی باشیمه گله
منّتدی جانه اینجیمرم ایتمرم گله
.
شمر ایلمز جفاسینی مندن مضایقه
فکری بو دور که تنگه گتورسون گلم دیله
.
اما اونون خیالی ازلدن خطا گیدوب
اولماز محبت اهلی اولان تنگ حوصله
.
هر ظلم ایستر ایلسون آخرده شمریله
دیوان کبریاده واریمدور مباهله
.
گر جان قویام مراحل عشقونده سهلدور
اوّل قدم گیچوب نظریمدن بو مرحله
.
اثبات ادّعای محبّتده شاهدیم
عدلینیدور قولومدا طنابیله سلسله
.
اولّام پیاده مرحله پیمای راه عشق
وورّام قدم قدملریم اولدوقجا آبله
.
من سندن اوتری چوللره دوشدوم روادی سن
بیر لطف ایدیب گتورمیه سن گوگلومی اله ؟
.
دوندرمه قانه گوگلومی ناز ایلمه دانیش
هر چند اولور همیشه گولون نازی بلبله
.
رحمه گلوب سوروشسان اگر حالیمی منیم
باخ گردنیمده حلقۀ قید سلاسله
.
آسوده لیق اولوب گیجه گوندوز منه حرام
نه آب و نه طعام و نه بیر زاد و راحله
.
هردم باخاندا حسرتیله قان اولور گوگول
نوک جداده قانه باتان زلف و کاکله
.
من دست بسته یرده جداده سنون باشون
وار بیر جدا بویونجا بو مابین فاصله
.
نه نیزه دن باشون اگوسن باغریما باسام
نه نیزه ده الیم یتور اول تار سنبله
.
سن باخ جدا باشیندا منه منده باشیوا
حسرتله آغلیاغ ایشیمیز دوشدی مشکله
.
گر چه الیم یتشمیری ال چکمرم گینه
زلفون کشاکشینده اولور حل مسئله
.
من یرده سن جداده ایداق ناله صبح و شام
یاخشی تاپولدی عاشق و معشوقه مشغله
.
سودای عشق چون سر زلفونله باشلانوب
سر رشته آلموشام او سر رشته دن اله
.
جان رشته سین کلافه کیمی الده دوتموشام
بازار شامه قالدی قرار معامله
.
شامین خرابه سینده بو سودا تمام اولور
چوخ چکسه آلتی آی چکه جاخ قویمارام ایله
.
سرمایۀ حیات بو سوداده یا گیدر
یا باشوی گتورّم او ویرانه منزله
.
سر مشقینی «حقیر» یمون اولده ویرموشم
دفترده یازماسون قلمی شعر باطله
.
- یکشنبه
- 24
- شهریور
- 1398
- ساعت
- 10:11
- نوشته شده توسط
- ابوالفضل عابدی پور
ارسال دیدگاه