نه غریبانه دی عمه بیزه بو غملی هوا
نابلددور بو بیاباندا قطار اسرا
قورخودان تیترور الیم ، هی یوزه گوز یاشیم آخور
ویر منیلن ال اله ، آی بی بی قلبیم داریخور
گوره حاشا بو فلک بیز کیمی بیر در به دری
آلتی آیدور دولانور قافله میز شهریلری
کربلادنده چتین اولدی بو شامون سفری
گزیروک چوللری آواره وطندن آرالی
گئدوروک شامه بی بی ، سن یارالی من یارالی
بو وفاسیز فلکه قلبیده وار چوخلی سوزوم
بئله بیر ظلمیلی دنیایه نه نوعیله دوزوم
یومولور آند اولا زهرایه ایاقه اوسته گوزوم
سنیمی آل نظره ، غملریمون حدینه باخ
اللریم اوسته منیم قمچیلرین ردینه باخ
ظلمتین پرده سی حایلدی گجه گوندوزومه
دوه لر آغلیور عمه منیم آغلار گوزومه
نه گناه ایلمیشم سیلی ویروبلار یوزومه
حاضرم تا ویرا مین سیلی منه قوم ستم
تکجه بیر یول قویالار کهف اوخیان لب دن اوپم
دوتولار گویده بولوتلار کیمی سینم گجه لر
قورولار دایره عشقیده ماتم گجه لر
تیره توپراقلار اولار دردیمه درمان گجه لر
او گچن گونلریمی من گینه یاده سالارام
اوتوروب اصغریمه هر گجه لایلای چالارام
عاشقانه آچارام خاطره لر دفتریمی
سالارام یادیمه شهزاده علی اکبریمی
نازیلن سینه سینون اوسته یاتان گونلریمی
گه گولوب گه دانیشوب ئوز ئوزومه گه دولارام
بعضا ال باشه آتوب زولفومی بیردن یولارام
منه دشمن وئره گر گویده کی مهپاره لری
ساغالار فکر ایلمه قلبیده دیل یاره لری
ایستورم اکبر آلان خیرداجا گوشواره لری
چون او گوشواره ئورک یاره سینه مرهم اولور
قانه ده باتسا گینه اکبریمون عطری گلور
خیردا قیزلار گجه لر رسمیدی بعضا اویانار
یوخی گلمز گوزونه کاسه صبری جالانار
اوتورار صبحه جک اولدوزلاری گویلرده سانار
منده اولدوز یرینه بسلیورم غم سسینی
سایارام صبحه کیمین قوللاریمون یاره سینی
ناقه لر اوسته منی ساخلاماق انصاف دگول
یر تیکانلیقدی گرگ خاریله یولداش اولا گل
قوی گزوم پای پیاده بو چولی ، آغلاما گول
بو محال امریدی شخصیتیمی غم دئیشه
بابا وای دیلده گرک شامه جنازه م یئتیشه
سن خیال ائتمه ئورک ملک سلیمانی گزور
یا ملکلر دولانان جنت الاعلانی گزور
کربلادندی گوزوم منزل ویرانی گزور
علتی وار او یری گورمگه قلبیم تله سر
چون بابام قول وئروب شامیده دیداره گله
یوخ سوزوم ایندی منیم دردیله یا شیونیلن
آلتی آیدور یولا یولداشلیق ائدورسن منیلن
نچه سوز وار ئورگیمده دئیورم من سنیلن
قلبیمون غملرینی سنله گینه بولملیم
بئله فکر ائلیورم شامیده من ئولملیم
منه ویرانه اگر حشره کیمین اولسا مکان
جان وئرن یرده منیم قبریمی قاز ائتمه فغان
سویله سجادیمه وئرسون باشیمون اوسته اذان
قویمامیش قبره ، قسم وئرم آخان گوز یاشیوا
یارلی پیکریمی عمه دولاندیر باشیوا
چک اول اللروی قمچی دگن اللریمه
آغلاما یوللارا حسرتله باخان گوزلریمه
گلسه غساله یقین غسل ائلمز پیکریمه
قالما آواره علاج ائت گل نیلوفریوه
کفن آختارما بی بی ، بوک منی ئوز معجریوه
یوزومه یرده کی توپراقی سپن وقته دی وای
بو گوزل اوخشامانی وئر هامی عالملره پای
یارلی قبره گئدن نازلی رقیم لایلای
بو بلاکش بالا یوللاردا چوخ اینجیتدی سنی
قویما شرمنده ئولم عمه حلال ایله منی
- دوشنبه
- 25
- شهریور
- 1398
- ساعت
- 9:44
- نوشته شده توسط
- علیرضا گودرزی
- شاعر:
-
بهزاد قاسمی اردبیلی
ارسال دیدگاه