• پنج شنبه 9 فروردین 03


شعر راه شام -(دوشنده شور ظفر قارداش اشقیا باشینا)

493

دوشنده شور ظفر قارداش اشقیا باشینا 
آییردیلار باشیوی ووردیلار جدا باشینا 

اولوبدی خنجره همدم سنون بلالی باشون 
وئروب جدایه صفا گون کیمی صفالی باشون 
صورا کول اوسته یاتوب قا نیلن حنالی باشون 
گئدور دمشقه چیخا خیزران طلا باشینا 

بو شام یوللارینون رنج ومحنتی چوخ اولوب 
یتیمه قیزلاریوا بس مشقتی چوخ اولوب 
علاوه ، نیزه ده کی باشه زحمتی چوخ اولوب 
نه سایه بان کی سالا سایه مقتدا باشینا 

چوخ اینجیدور بیزی قارداش بو قوم غارتگر 
وروللا ناقه لر اوسته اوشاقلاری یکسر 
اولوبدی گولشنیوین غنچه بیر گولی پرپر 
آناسی قاره نین اوستن سالوب قرا باشینا 

دئنن گوروم بو بلادیده دن بلا قوتولار 
و یا بلای عدودن بو گوزلریم دوتولار؟ 
ایاق یالین بیزی قارداش دولاندیریللا بولار 
سالوبلا سایۀ ارعابی اقربا باشینا 

حسین یارالی باشیندان دگنده سنگ مُحن 
جوشوب داماردا کی غیرت قانیم منیم علناً 
بلالی باشیمی چالدوم سینیق کجاویه من 
وئروبدی قرمزی قان زینبین جلا باشینا 

او قدری آغلامیشام قورتولوب بو گوزده کی یاش 
سرشگ ِتر عوضیندن گوزیم اولوب خونپاش 
آخان بو گوزیاشیم ایلر ئورک یاراسینی فاش 
بیلوندیرور نه گلر زینبین اخا ، باشینا 

گهی دوشور یادیما جان وئرن زمانین حسین 
گهی دوشور یادیما نیزه ده بیانین حسین 
گهی دوشور یادیما اکبر جوانین حسین 
گوراخ قدَر نئده جاق عاقبت قضا باشینا 

سواد شبده حسین ! کسدیلر سحر باشینی 
وروبلا نیزیه حتی او صودامر باشینی 
گورنمورم ولی عباس خونجگر باشینی 
عمود قویمادی گویا چیخا جدا باشینا 

کمند جور و جفایه قضا سالوبدی منی 
پوزوبدی صرصر گردون صفای انجمنی 
ائدوبدی لشگر کین کینه سین بو گون علنی 
ائدوبله باشیوی همرنگ ، مرتضا باشینا 

حسین بو یوللاری زینب دولانمور ئوز باشینا 
دلیلی واردی دگور تازیانه گوز باشینا 
بوسوزکی من دیورم باشدی هامّی سوزباشینا 
صفای عشقیدی دوشموش بو مبتلا باشینا 

دیولَّه شامیده بازاری باغلیوب حُمَقا 
بو فکریلن کی گلور شامه خارجی اُسرا 
دوشوب کیمین الینه گور زمام دین عجبا 
سرور و شوقیله بیربیر یاخوب حنا باشینا 

او دم کی نیزه ده باشین آغیرلاشوبدی سنین 
وئرنمیوب حرکت نیزیه گروه لعین 
گوروب بوصحنه نی سجاداولوبدی زاروغمین 
گوزی دولوب دئدی جانیم فدا آتا باشینا 

اشاره سی وار اونون بیر حدیث پراَسفه 
کی مه لقا بالالاردان بیری دوشوب خَسفه 
تا پیلما سا او بالا گر ، یتنمه سیز هدفه 
بو سوزده یوللادیلار زجری بینوا باشینا 

او نازنین بالانی تاپدیلار گوزی آغلار 
ائدوردیلر اونی ترک چهارپایه سوار 
دیوبدی صاحب ناموسم ائتمیون اصرار 
گلایمی ائدرم شاه نینوا باشینا 

بیلون ؛ مجازه حقیقت قوشی شکار اولماز 
ئوز عفتیندن حسینون قیزی کنار اولماز 
ئولونجه مرکب نامحرمه سوار اولماز 
اگرچه گلسه اونون مین بئله بلا باشینا 

حسین؛یول اوسته اونون اولدی بیرایاقی یارا 
آچوبدی باشدان او دم معجرین سفیر ِ حیا 
بؤلوبدی ایکّی یره باغلیوب بیرین ایاقا 
بیرینده باغلادی اول معدن حیا ، باشینا 

«مُصَیّبین» قلمینده نه وار توان یازاجاق 
حسین و کربوبلادن،چیخینجا جان یازاجاق 
بو نیتیله ئورک سوزلرین عیان یازاجاق 
کی جان وئرنده ، گله شاه کربلا ، باشینا 

  • دوشنبه
  • 25
  • شهریور
  • 1398
  • ساعت
  • 10:44
  • نوشته شده توسط
  • علیرضا گودرزی

برای بارگذاری فایل در سایت اکانت مداحی بسازید



ارسال دیدگاه



ورود با حساب گوگل

ورود کاربران