ائتدی قارداشیم حسین دین اوسته نهضت کربلا
اولدی بو ششگوشه قبری عرشه زینت کربلا
.
دسته دسته فوج فوج ایلر ملائکلر نزول
پای بوسیندن تاپار جمله شرافت کربلا
.
انبیالر خاکسار ایلر اوزون بو مرقده
درد دل ذکر دعایه وار اجابت کربلا
.
بو سفردن گلمیشوق لطف ایلیوب پروردگار
شکر لله تاپموشوق فیض زیارت کربلا
.
کوفیه وارد اولاندا آل طاها قول کیمی
ظلم طوفانی قوپوب اولدی قیامت کربلا
.
دل یاراسی، سنگسار، آواز چنگ و نای دف
داغلی دللردن آلوب صبریله طاقت کربلا
.
کف چالوب گولدی بیزه اللر حنالی کوفیان
قلب لرده وار شماتتدن جراحت کربلا
.
باخمادیم یاسلی غریبم، شیرزن مرد آفرین
دشمنی سرکوب ایتدیم اولدی خدمت کربلا
.
بیر بیره ووردوم یزیدین مجلسین گفتاریله
کفر تشکیلاتنا ائتدیم اهانت کربلا
.
سس حزین، نطق آتشین، مجلس نه مجلس شاهوار
چولقادی حضّاری رُعب و خوف و وحشت کربلا
.
بزم شربی ایلدیم بیر بزم وعظ و تهنیت
آشکار اولدی بیزوخ حقّ و حقیقت کربلا
.
باجی قارداش قویمادوخ نقصانی قالسون نهضتین
من دانشدیم او ائدوب قرآن تلاوت کربلا
.
مجلسین نظمین پوزوب ظلم آیه سی قرآن سسی
اولدی رسوا تا یزید بی مروت کربلا
.
تازه بیر ظلمه ال آچدی خیزران آلدی اله
لعل فام گول لبلره ایتدی جسارت کربلا
.
گوندوزی شامون اولوبدی بیزلره ظلمت گجه
هر گلن ویرانیه ایتدی شماتت کربلا
.
ظلموده بیداد ایدوب ابن زیاد بی حیا
اذن عام ویردی اراذل ایتدی کثرت کربلا
.
حق دانشدیم مجلسینده قتلیمه اقدام ایدوب
نقش بر آب ایتدی حقدن استعانت کربلا
.
آنلادی ظالم همیشه ظلمونون مغلوبیدی
مست جام ذلت ایلوب پست فطرت کربلا