اولدی مستخلص باجون قید اسارتدن حسین
قامتی امّا بوکولدی بار محنتدن حسین
.
.
چوخ ائدردیم آرزو قبرون زیارت ایلیم
بو گوزل قبرونله من کسب سعادت ایلیم
دردیمی بیر بیر سنه قارداش حکایت ایلیم
گر چه آگهسن اوزون هر بیر مصیبتدن حسین
.
.
عالمه ویردیم نشان قارداش وفای عشقیمی
گون به گون باشیمده آرتیردیم هوای عشقیمی
اهتزازیله فراش ایتدیم لوای عشقیمی
دینی احیا ایلدیم من بو اسارتدن حسین
.
.
من مصائبده حسین سنله شراکت ایلدیم
صابر اولدوم هر بلاده استقامت ایلدیم
شامیده گوردی باشون نه نوعی نهضت ایلدیم
ایلدیم هنداوغلونی رسوا او نهضتدن حسین
.
.
ساغر جهلیله شام اهلی زبس اولموشدی مست
دین ایوین گوردوم ایدور صوری مسلمانلار شکست
خلقه آندیردیم جماعت اولمیون دنیاپرست
پرده نی ردّ ایلدیم روی حقیقتدن حسین
.
.
گوردی باشون ایلدیم هر یرده تبلیغات دین
بو گوزل باشدور دیدیم خلقه ایدن اثبات دین
دین اگر مصباح فرض اولسا بودور مشکات دین
خلقی هشیار ایلدیم تک تک بو صحبتدن حسین
.
.
اونداکی حقدن یتیشدی انبیایه بو ندا
محضر جانانیده کیمدور ایده جانین فدا
اولمادی بیر کس دیسون لبّیک، حسین ویردی بلی
ایتدوقی عهد اوسته گیچدی جاه و عزّتدن حسین
.
.
خلقه آندیردوم بو باشدور عرش حق پیرایه سی
جدّینه نازل اولوبدور مصحفین هر آیه سی
یعنی مستحکم اولوب بو باشیله دین پایه سی
ویردی اسلامه بقا امر شهادتدن حسین
.
.
آهوان عشق قالدی نچّه مدّت دامیده
هر بیری بیر خدمت ایتدی عالم اسلامیده
بو سفرده حیف اولا بیر دُرّ ایتردیم شامیده
قبرون اوسته من گلنموردوم خجالتدن حسین
.
.
شامیده افسوس ایتیردیم بیر دُر شاهانه من
عشق بازارینده عالملر اونا اولماز ثمن
بو دُرون معیارینه عاجزدی صرّاف زمن
سرّی واردور آیریلانموردوم او تربتدن حسین
.
شامیده ویرانسراده قالدی بیر عالی سیر
کاخ جور و ظلمی عالمده ایدر زیر و زبر
دین حق نورین ایدر گون تک جهاندا جلوه گر
گلشن دینی دوشه قویماز طراوتدن حسین
.
.
تیره توپراقه یزیدین قصرینی تبدیل ایدر
دهریده جور و ستم کابینه سین تعطیل ایدر
شامیده بیر مکتب عشق و وفا تشکیل ایدر
عالمه تعلیم ایدر درس شریعتدن حسین
.
.
شامیده پایانه ویردی عشق تحصیلاتینی
اوچ یاشیندا قیز یزیدین پوزدی تشکیلاتینی
صرف دین ایتدی خرابه یرده اوز اوقاتینی
ایلدی بیدار خلقی خواب غفلتدن حسین
.
.
بیر ستاریدی رقیّه شامیده باتدی حسین
چوخ گجه ویرانسراده آج سوسوز یاتدی حسین
ساربانلار ووردی اُلدی، مقصده چاتدی حسین
اولدی راحت سویگلون طعن شماتتدن حسین
.
.
بیر گونی گوردوم یره نقش ایتدی بیر خطّ جلی
بوینی چیگنینده او خطّه گوزلرین تیکدی ولی
متّصل گوردوم دیور گل هارداسان قارداش علی
صون نفسده گل منی قورتار بو حسرتدن حسین
.
.
قسمتون اولسا #امینی کربلا بو اربعین
بو سفرده حقّیدن ایسته که اولسون همرهین
سوؤدوقون اشخاصلر یعنی هامی اهل یقین
بیر نولور عرض قبول ایتسون کرامتدن حسین
.
.
ایستوسن آرامشون اولسون بو خلقه آز قارش
کیم سنه گلسه یاخین سن گیت ولی اوندان یانش
باوفا انساندی سعی ایله جلالیله دانش
ایسته خوش باخسون سیزه مهر و عطوفتدن حسین
.
.
- دوشنبه
- 1
- مهر
- 1398
- ساعت
- 11:2
- نوشته شده توسط
- ابوالفضل عابدی پور
- شاعر:
-
مجید امینی
ارسال دیدگاه