من علی شمع جمال وصلووه پروانیم
هجر زنجیرینده محکم باغلانان دیوانیم
.
.
عشق بازارینده قویدوم دود دلدن باشه تاج
آلمیشام عشاق عالمدن عجب باج و خراج
سلطنت زوریله اولدی روز روشن لیل واج
شامیدن شامه قرانلوق مملکت سلطانیم
.
.
نچه مدتدور کمند زولفوون پابنديم
آتش هجرانوون بیر اودلانان اسپندیم
اوز وجودیم محو اولوب عشق عالمینده زندیم
سربسر باخسون گوررسن جسم و جاندان فانیم
.
.
شامده ویرانه منزلده اگر قالسام خوشام
مبتلای درد هجرانم اسیرم ناخوشام
آت دوشونده قاچماقا باخما وجودیمدن بو شام
نیزه ده قانلو باشون چوللرده سرگردانیم
.
.
ابر زلفون مه جمالوندن کنار اولسا اگر
گورسنور باشونده ظاهر معجز شق القمر
مادر گیتی دوغانماز سن کیمی زیبا پسر
آچ گوزون لطف ایت منه بیر باخماقون قربانیم
.
.
شعلۀ شمع شبستانیمدی حُسن طلعتون
محرم بزم وصالیمدور حریم وصلتون
قاره معجردور باشیمدا ئورتموشم طوی خلعتون
بیر قبیله کاروانون من عزا عنوانیم
.
.
پادشاه ملک عشقم اولموشام شمره اسیر
قولاریم باغلو پیاده آت دوشونده دستگیر
اولموشام قارداش علی جاندان داخی دنیاده سیر
آند اولا اوز جانیمه ئوز مرگیمون خواهانیم
.
.
سن اگر محبوب حق سن منده معشوق جمال
بیر سویولموش کاروان باشیمده وار جزو جلال
توکموشم هجران لباسین تا تاپام قرب وصال
منده ئوز مجنونیمون لیلا صفت حیرانیم
.
.
من جنون کوی عشقم منزلیمدور کوهسار
عاشق هجرانه خوشدور خلوت بزم نگار
اذن وئر باد صبا زلفون ائده یوزدن کنار
بیر گوروم قانلو گوزون من گوزلرون قربانیم
.
.
خیمه لر قارداش یانان گوندن یوخومدور سایبان
گون قباقینده هامی منزلده ساخلار ساربان
دردلن سینم دولوب ائتسم اگر شرح و بیان
ایله سن تصدیق اوزون اول خانمان ویرانیم
.
.
بی مروتلر وئروب نچّه سنق محمل بیزه
شمع تک باخسا یانار دیوانه و عاقل بیزه
کاروان بیر یرده دوشسه چول اولور منزل بیزه
منده سرگردان او ویران منزلین دربانیم
.
.
وادی شاماتی یکسر گوز یاشیم ایلر خراب
رشتۀ زلفون ائدوب قارداش منی بند طناب
دولدورور دونیانی قارداش وای دینده انقلاب
سنبل زلفون جداده بلبل خوش خوانیم
.
.
رمز عشقیله وئروب قانلو باشون گویا جواب
وئرمیشم جانانیمه دل اولموشام من کامیاب
سن عزیز عالمین سن ای عزیز بوتراب
من بلا یعقوبینون بیر یوسف کنعانیم
.
.
نیزه ده قانلو باشیما باخما سن دیره گئدر
راهبی جذب ائتماقا گوز اوزگه بیر سیره گئدر
دین حق ترویجینه سر منزل غیره گئدر
کفره تورات و زبورم مسلمون قرآنیم
.
.
روفه گر عقلون آزالمیش اولموسان دنیا پرست
خاطروندن محو اولوب یا وعدۀ روز الست
صدقدن آلدون نفس الحق سوز اولدی باز بست
بولمسین پیغمبر اوغلی صدقیله بیگانیم
.
.
- سه شنبه
- 9
- مهر
- 1398
- ساعت
- 16:15
- نوشته شده توسط
- ابوالفضل عابدی پور
- شاعر:
-
مرحوم روفه گر
ارسال دیدگاه