بابا او گون که بو ویرانه نی مقام ایلدیم
تمام درد و بلانی اوزومه رام ایلدیم
.
خدا بُلور بابا من بو خرابیه دوشه لی
نه نوعی شامی ایدوب صبح، صبحی شام ایلدیم
.
او قدر شقّه گشا ایتدیم آهیمون چَترین
گونون یوزینه گونوم تک سیه غمام ایلدیم
.
خیال تار زلف علی اکبریله بابا
ایشیق گونی گوزومه لیله ی ظلام ایلدیم
.
دیدیم اُلونجه علی قارداشیم گَلر گورّم
قضایه باخ منه باخ، گور نه فکر خام ایلدیم
.
بُلوردون آخِر عمریمدی گورماقا گَلدون
بو گَلماقونلا بابا منده اخذ کام ایلدیم
.
گرک ایدم عوضینده نثار جان نقدین
بو فکریله اوزومی نائل مرام ایلدیم
.
میسّر اولمادی بوندان نفیس بیر تحفه
نثار اشکیله پابوسیوه خرام ایلدیم
.
اگرچه ایلمدیم پیشواز معذورم
بیله خیال ایلمه ترک احترام ایلدیم
.
دیزیمده اولمادی طاقت دورانمادیم اَیاقا
اگرچه دورماقا هر قدر اهتمام ایلدیم
.
پناهی سَن هامی عالم لرین دیوب عمّم
اودور که دامنیوه منده اعتصام ایلدیم
.
یورولموشام منیده بو خرابه دن قورتار
بو یرده دردیله اُلفت عَلَی الدَّوام ایلدیم
.
نه تک منیم گئجه لر گَلمدی یوخی گوزومه
وفالی عمّه مه ده یاتماقی حرام ایلدیم
.
ایدوم نه چاره اسیرم سپاه اعدایه
قوری یر اوستونی علّت اودور مَنام ایلدیم
.
گیدنده غارته جبریله گوشواره لریم
نه یادِ جاه و جلال و نه احتشام ایلدیم
.
برهنه پائیله غارتده من قاچاندا چوله
نه قدر خار مُغیلانی سرخ فام ایلدیم
.
هنوز وار اَیاقیمدا همان علامتدن
اگرچه اشکیله ظاهرده التیام ایلدیم
.
بلالی قیزلاری هر یرده باشیمه یغدیم
عجب او جمع پریشانی با نظام ایلدیم
.
حجازیدن دولانوب کربلایه من گَلدیم
فقط بو یرده خطِ سیریمی تمام ایلدیم
.
واریمدی چوخ غمیم امّا امان شمادتدن
خدا بُلور من او ظلمه نجه دوام ایلدیم
.
دیار کوفه ده الله بُلور نَلَر چَکدیم
بیری بودور که تماشای بزم عام ایلدیم
.
بیری بودور دوشَنوب سفره لِیک من اوزومی
او احتیاجیله مُستغنیِ طعام ایلدیم
.
بیری بودور بیزی زندانه سالدی اهل عناد
او یرده شکر خداوند لایَنام ایلدیم
.
یزید مجلسینون آه آتشینیمیله
پوزوب نظامینی معناده بی نظام ایلدیم
.
اگرچه غصّه لر ایتمیشدی چوخ فتاده منی
دفاع ظلمه او یرده گنه قیام ایلدیم
.
اولاندا لعل لبون آشناسی چوب جفا
توکوب سرشکیمی بیر محشر عظام ایلدیم
.
سسیمه ویردیله سس تا بلالی عمّه لریم
سکوتِ مجلسی پوزدوم بیر ازدحام ایلدیم
.
سرشکیمیله یزیدین فجایعین یازدیم
بنی امیّه نی رسوای خاصّ و عام ایلدیم
.
یوزومده نیلی سیلی گوروب پوزولما بابا
بو رنگی محشره عنوان انتقام ایلدیم
.
گرک مدینه خیالین بابا باشیمدان آتام
که خوابگاهیمی آخِرده شهر شام ایلدیم
.
کمال لطفدی #خوندل تذکر #عاصی
او علت اولدی بیر آزلیقدا اختتام ایلدیم
.
ائدر بو سوز منی شرمنده روح #آصف دن
او گون که عمه بو شام ایچره من مقام ایلدیم
- چهارشنبه
- 10
- مهر
- 1398
- ساعت
- 12:13
- نوشته شده توسط
- ابوالفضل عابدی پور
- شاعر:
-
حاج حیدر خوندل
ارسال دیدگاه