خرابه ده نقدری من
چکوم مصیبت عمّه جان
اوسانموشام حیاتیدن
چتیندی غربت عمّه جان
.
.
عزیز روزگاریدیم فلک منی حقیر ائدوب
آلوب جلال و جاهیمی بو حالیله اسیر ائدوب
قویوب یتیم و شمر دون الینده دستگیر ائدوب
منی بو حالته سالوب او بی مروّت عمّه جان
.
.
دوتوم که ظلم الینده من اسیرم عمّه بو زمان
نئجه بو درد و نیسگیلی اورکده ایلیوم نهان
مگر اسیر اولانلارا اولور خرابه لر مکان؟
نه فرش وار نه بیر چراغ نه استراحت عمّه جان
.
.
گئجه گونوزده مَشغَلَم اولوب بو شهریده فغان
ز بس اورکدن آغلادوم سرشک چشمیم اولدی قان
گورولّه من آتاسیزام ورولّا طعنه شامیان
مگر یتیم اولماقیم دگول کفایت عمّه جان؟
.
.
اماندور عمّه چاره قیل منیم غم و ملالیمه
کسیلدی صبر و طاقتیم آتام دوشوب خیالیمه
من آغلارام بو شامیان گولولّه اشک آلیمه
کیمی باخوب گولر ، کیمی ائدر شماتت عمّه جان
.
.
جهاندا بیر عزیزه نون منیم تک عزّتی گئدر؟
اوشاقلیقیندا من کیمی کیم اولدی بیله دربدر؟
نه بیر اجل گلوب منی بو ورطه دن خلاص ائدر
نه وار آتام که ایلسون منه حمایت عمّه جان
.
.
همیشه درد الینده من اگر چه زار و مضطرم
بو درده خوشدلم که من مریض عشق اکبرم
یتوبدی جان دوداقیمه عزیز جانی گوزلرم
ندن بیر ائتمز اکبریم منی عیادت عمّه جان؟
.
.
بو گوشۀ خرابه ده غمیم جهانی یاندیرور
یتیمون آهی چون تمامِ ماسوانی یاندیرور
بو ماجراده «ذهنی» نون کلامی جانی یاندیرور
گرک جزاده یانماسون ائدک شفاعت عمّه جان
.
.
- چهارشنبه
- 10
- مهر
- 1398
- ساعت
- 13:7
- نوشته شده توسط
- ابوالفضل عابدی پور
ارسال دیدگاه