زهرانین ایدر قلبینی قان بو غم و حسرت
اوغلی حسنه اؤز وطنین ایتدیله غربت
.
.
قان قطره سی وار من دئمورم گول دوداقیندا
یا نوک عصا زخمی مقدس ایاقیندا
چوخ نسگلی وار قبری قالوب گون قاباقیندا
زوّاری اوزاقدان ایدر اظهارِ ارادت
.
.
تحریم ایلیوبلر او شهین بوس و کنارین
ممکن دگی احبابی اؤپه توزلی مزارین
سیلسه سیله جاق باد صبا گرد و غبارین
یا یاندوراجاق پرتو مه شمع محبت
.
.
بیر دوشسه دوشر وقفه ده حجّاج گذاری
اولماز اونا بیر کیمسه ائده گوز یاشی جاری
سپسه سو سپر قبرینه باران بهاری
هر گون سحر ایلر گون او مظلومی زیارت
.
.
مشکل او مزاره یته زوّار ایاقی
افسوس نه وار گنبد و ایوان و نه طاقی
نه بقعه نه صحن و نه ضریح و نه رواقی
نه ایله گوزل قبره نشان وار نه علامت
.
.
بیر شه که اونون لطفیدی رأفتدی صفاتی
بیر گون کیمی تابنده دی تاریخ حیاتی
آیا نه روادور بو تأسفله وفاتی
قتلینده ایدوب اؤز حرمی اؤزگیه سبقت
.
.
تنگ اولدی مدینه او قدر ایتیله تهدید
قالموب وطنینده داخی بیر مؤمن و امّید
آخر اوزینه آلدی او شه حالت تبعید
شهریندن ائدوب موصله ناچارعزیمت
.
.
چوخ زهر ویروبله پوزولوب صورت حالی
عمرینده مکرر او گونون اولدی زوالی
آخر او شهی ایلدی مسموم اؤز عیالی
یارب یوخوموش جعده ده انصاف و مروت
.
.
چوخ ظلملر اولدی او شهنشاه حجازه
بیگانه گلوب زادۀ زهرایه نمازه
تابوتیده اوخلاندی جفائیله جنازه
عالم گوره بُلمز ایله دهشتلی جنایت
.
.
هر چند بو مظلوم اولوب ظلمیله مسموم
ترک ایلدی بو عالمی چوخ غصّه لی مغموم
اما هانی بیر کیمسه حسین تک اولا مظلوم
مظلوم غلط دوشدی دئ دریای شهامت
.
.
صدّیقۀ صغرا شرف عترت طاها
زهرا قیزی گنجینۀ غم زینب کبرا
گوردی حرمی قصد ایلیوب لشکر اعدا
خرگاهه جلو ریز گلور اهل شرارت
.
.
«خوندل» دئمه غفلتدن او ظلم اهلی دایاندی
بیر ظلمیله صحرای بلا قانه بویاندی
زهرانین اوغول وای سسی افلاکه دایاندی
نشر اولدی هامی عالمه معنای شهادت
.
- چهارشنبه
- 17
- مهر
- 1398
- ساعت
- 14:47
- نوشته شده توسط
- ابوالفضل عابدی پور
- شاعر:
-
حاج حیدر خوندل
ارسال دیدگاه