یتیشوب دوداقه جانیم
ئولورم جواد اوغول گل
اوجالور گویه فغانیم
ئولورم جواد اوغول گل
.
.
.
.
گوزلریم قالوبدی یولدا
فرقتونده اشکبارم
زهر کینیله یانور دل
آتش غمه دچارم
خوشدی صون نفسده گلسون
گل یوبانما انتظارم
باشه یتدی امتحانیم
ئولورم جواد اوغول گل
.
.
.
.
ای منیم بدنده روحیم
ای گول اوزلی نوجوانیم
اولما راضی بوندان آرتیق
عرشه اوج ائده فغانیم
یوخدی بیر کسیم غریبم
واردی بیر سنه گمانیم
ای عزیز مهربانیم
ئولورم جواد اوغول گل
.
.
.
.
نه باجیم یانیمدا واردی
بیر دویونجا آغلییدی
گوزونون یاشین توکیدی
باری سینه داغلییدی
سسلییدی قارداش ای وای
گوزلریمی باغلییدی
دلده وار غم نهانیم
ئولورم جواد اوغول گل
.
.
.
.
آیری دوشموشم وطندن
طوسده اوغول غریبم
نه یانیمدا ائل قبیلم
باجیدان دا بی نصیبم
قطره قان دوروب لبیمده
دردمند بی طبیبم
یورولوبدی خسته جانیم
ئولورم جواد اوغول گل
.
.
.
.
باجیما که نامه یازدیم
گله بو دیار طوسه
اونی پیشواز ائدنلر
گئده لر کنار طوسه
گلوب عزتیله مهمان
اولا شهریار طوسه
گله بو چتین زمانیم
ئولورم جواد اوغول گل
.
.
.
.
منی گردش زمانه
ئوز باجیمدان آیری سالدی
توش ائدوب غم فراقه
دلدن اختیاریم آلدی
سوگولی باجیم گلوردی
یوخسا شهر قم دا قالدی
اودی حالیمه یانانیم
ئولورم جواد اوغول گل
.
.
.
.
دردیوون ای « احمدیان »
یازماقین ائله فریضه
صدقیله او شاه طوسه
گوز یاشیله یاز عریضه
اودی بیر طبیب حازق
او شفا وئرر مریضه
دئنه درد آلوبدی جانیم
ئولورم جواد اوغول گل
- چهارشنبه
- 17
- مهر
- 1398
- ساعت
- 15:7
- نوشته شده توسط
- ابوالفضل عابدی پور
- شاعر:
-
اصغر احمدیان خسرو شاهی
ارسال دیدگاه