زبانحال امام رضا (ع)
.
گل ای دیار غربت آرا یاوریم اوغول
خوارم اوغول غریبم اوغول سروریم اوغول
.
جان ویرمرم قیامته دین گوزلریم سنی
گل گور نجه یولوندا قالوب گوزلریم اوغول
.
یوخ بیر کسیم وصیت ایدم گلموری بالام
قورخوم بودور اورکده قالا سوزلریم اوغول
.
جدّیم حسینیله منی بیر جان خیال ایله
منده سنه خطاب ایدرم اکبریم اوغول
.
معصومه نی یانونجا گتور قارداشی ئولور
زینب کیمی عزاسی دوتا خواهریم اوغول
.
گل گور نه نوع زهر جفائیله دوغرانوب
آغزیم دلیم سینم جگریم لبلریم اوغول
.
.
✔️ جواب امام جواد (ع)
.
گلدیم یانقلی دیللروه من فدا آتا
چکمه نوا که گلدی گلون بی نوا آتا
.
بیر بلبل بهار خیالیله گلمیشم
امّا خزان ایگی ویروری بو هوا آتا
.
من گلمیشم خبر آپارام اهل بیتوه
مدّتدی گوز تیکوبله یولا اقربا آتا
.
مامون سنی گتوردی امامت هواسیله
وامحنتا بو ذلّته واغربتا آتا
.
.
✔️ آمدن امام جواد (ع) به بالین امام رضا (ع)
.
قویوب ایاقینی دهلیزه چون فغانیله
گوروب قویوبدیلا بیر طشت دولوبدی قانیله
.
باخاندا طشته نه گوردی امام اهل نظر
که پاره پاره جگرلر او قان ایچنده اوزر
.
باخوب او قانه گوروب گوگلی قانیله دولوری
او قانی ایگلدی گوردی که جان ایگی گلوری
.
نه قاندی بو که ایگی ایلدی منی بیهوش
گورن زمان گینه بو قانی قانیم ایلدی جوش
.
نه طشت دور بو مگر طشت کربلادور بو
دولوبدی قانیله صحرای نینوادور بو
.
جگرلرین هره سی بیر شهیددور عریان
که پاره پاره دوشوب قانینه اولوب غلطان
.
باجیم یانیمدا بو وقتیمده کاش اولیدی منیم
که غشّ ایدر اورگیم آنّی اوویدی منیم
.
دوشوبدی تنگه گوگل غمدن اولموری آزاد
گوزوم قالوب قاپودا گلمدی تقی جواد
.
غریب ئولنده جان اوستونده صاق صولون گوزلر
آتا ئولنده جوان اوغلونون یولون گوزلر
.
ـــــــــــــــــــــــ
بیر بلبلم که راه گلستان ایتورمیشم
بیر قمریم که سرو خرامان ایتورمشم
بیر لال طوطیم که فلک تلخ کام ایدوب
حیرتده قالمیشام شکرستان ایتورمیشم
.
.
- چهارشنبه
- 17
- مهر
- 1398
- ساعت
- 15:9
- نوشته شده توسط
- ابوالفضل عابدی پور
ارسال دیدگاه