ای کاش اولیدی ویران
بو چرخ کج مداری
شامه اولاندا داخل
آلِ عبا قطاری
.
.
اهل حرم سراسر عریان جمازه اوسته
باشلار آچوق تماماً قوللار طنابه بسته
اولموشدی ظلم الیله مغلول امام خسته
بی طاقت ایلمشدی زنجیر او باوقاری
.
.
امر ایلمشدی سلطان عیش ایلیه رعیت
اولموشدی شامون اهلی مشغول عیش و عشرت
ایولرده قالمامشدی نه بر کیشی نه عورت
دوتموشدیلار تماشا قصدیله رهگذاری
.
.
گیمشدی شامون اهلی یکسر لباس تازه
الده کیمی نی و دف چخمشدی پیشوازه
بیر پیشواز اولوندی رأس شه حجازه
بانگ نی و دف و کف دولدوردی روزگاری
.
.
دروازه دن اولاندا غم فوجی شامه داخل
بر نوعیلن نظامه سالمشدی قوم باطل
اولموشدی هر کسوک باش بر محمله مقابل
چخمشدی اهلبیتون افلاکه آه و زاری
.
.
اکبر باشین گورن دم لیلا مقابلنده
بر تازه شور و شیون باشلاردی محملنده
اولماز او حاله مطلق طاقت آنا دلنده
گیتمشدی اول غریبون هم صبر هم قراری
.
.
گیتمشدی ناقه اوسته زینب ایله تواندان
قالموردی بر او قدری کسسون علاقه جاندان
ناگه آلوب حسینون قرآن سسین سناندان
آئینه دلندن سیلدی او سس غباری
.
.
دوتدی یوزین جدایه اول بانوی مودب
ایتدی بو دللریله قارداشنی مخاطب
گور بر دوشوب نه حاله قارداش بلالی زینب
غمدن گلوبدی تنگه یوخ کیمه غمگساری
.
.
بیر غرفه دن تماشا ایلوردی بر لعینه
قرآن اوخوردی گوردی راس شه مدینه
شرم ایتمدی خدادن بر داش آلوب الینه
ایتدی نشان جداده اول راس زخمداری
.
.
دگمشدی اول مقدس باشه اون ایکی یاره
آسان سانوب عجوزه آتدی داشی دوباره
داش گلدی دگدی فرق سلطان تاجداره
قرآن سسی کسلدی القانی اولدی جاری
.
.
ایلردی هر گذرده بیله ندا منادی
بو دستگیر اولانلار اولاد مرتضادی
هر کیمسه نون دلنده وار مرتضا عنادی
هر نوعیله اذیت ایتسه وار اختیاری
.
.
تاپدی شقی جماعت جرات همین خبردن
ظلم ایتدیلر او قدری گیچمزدی هیچ نظردن
گه کُل توکوب گهی اود شام اهلی باملردن
چکدی بنات زهرا بو درد بیشماری
.
.
بیمار امامون از بس گیتدی قراری الدن
اودلاندی بو کلامی فرمایش ایتدی دلدن
ایکاش گلمییدیم دنیایه من ازلدن
تا اینکه گورمییدیم بو ظلم ناگواری
.
.
تحصیل آدمیت ایله «شهاب» اول آدم
مطلق اولور ملکدن آدم اولان مقدم
گر ایسته سن یازاندا روح القدس ویره دم
پاک ایله سوز محلین درک ایت بو اعتباری
.
.
- پنج شنبه
- 18
- مهر
- 1398
- ساعت
- 12:13
- نوشته شده توسط
- ابوالفضل عابدی پور
ارسال دیدگاه