ای هند جفا شعارون اوغلی
چوخ فخر ایلمه خلافتون وار
غصب ایلموسن سریر حقی
حقیله سنون عداوتون وار
.
.
مردان و زنان آل هاشم
تصدیق اولونوب دیانتیله
اول بیزی ذات حق تعالی
مقرون ایلیوب عبادتیله
آخرده بو نعمت الهی
تکمیله یتوب شهادتیله
فکر ایتسون اگر کیچیلمیشوق بیز
مغزونده عجب سفاهتون وار
.
.
اولاد علی رجال عالم
یا یر یوزونون ستارگانی
سن امر ایلدون بلا چولونده
بیربیراولارون توکولدی قانی
آثارلری فنایه گتمز
هر قدر ایلسونده جانفشانی
ظاهرده بیزه ظفر تاپوبسان
باطنده سنون نه قدرتون وار
.
.
بدریله حنینی یاد ایدورسن
کچمش گونه انتقام آلورسان
اقواموی خاطره سالورسان
ساقینی گورنده جام آلورسان
رأس شه دینی اینجیدورسن
قان طشته آخاندا کام آلورسان
یحیای زمانی خوار ایدورسن
قلبونده نه ذوق عشرتون وار
.
.
فکر ایلیوسن امور خلقی
دائم قویاجاق زمان الونده
ظلمون یخاجاق لوای عدلی
قبضه اولاجاق جهان الونده
نه قالمیاجاق بو تخت تاجون
نه چوبۀ خیزران الونده
یوخدور بیزه ایندی بیر کومکچی
اجرا ایله هر سیاستون وار
.
.
سن تیشۀ نفسویله دینون
گلزاری ریشه دن بیچورسن
ناز نعم جهان فانی
سرمست ایدوب هر ندن کچورسن
پیغمبر عزیزین ئولدوروبسن
شکرانه سینه شراب ایچورسن
خار ره رهروان حقسن
اجدادوه چوخ شباهتون وار
.
.
هی سسلنوسن گذشتگانون
بو بزمه گلوب مجلل اولسون
مجلسده اولار گر اولسا حاضر
قویمازلا ستم مفصل اولسون
سویلله سنه او باشی ورما
ال ساخلا یزید الون شل اولسون
طی ایلمه بیز گیدن طریقی
گرچه بیزیله قرابتون وار
.
.
یابن الطُّلقا دگل عدالت
انظار عموم اجنبیده
قول باغلی دورا بنات زهرا
دلخسته و زار و رنجدیده
چادر شبی باشدا اوز عیالون
تالار حیاده آرمیده
واضحدی بنات مرتضایه
مطلق نظر اهانتون وار
.
.
دلدن گوروسن سالوب اسارت
گلمور دله دلشکسته قزلار
آزاد نفس چکنمیوبدی
مدتدی بو دست بسته قزلار
عریان دوه لر یوروبدی یورما
هرظلمه دوزوبدی خسته قزلار
دنیانی بیزه نه تنگ ایدوبسن
ظالم نقدر شقاوتون وار
.
.
قداره کشان اهل کوفه
فرمانوی بیربیر ایتدی اجرا
یتمش ایکی شخص بی نظیرون
ووردی باشینی جدایه اعدا
خونین کفنان کربلانون
آت چاپدیلا نعشی اوسته حتی
دستور سنوندور ای ستمگر
هر امریده مین جنایتون وار
.
.
دیوان عدالتِ جزاده
زهرانون آخاندا اشک پاکی
جبریل امین کچنده شاهد
پیغمبر اولان زماندا شاکی
سندن اولاجاق سوال او ساعت
بو قتللرون ندور ملاکی
مدرک ایده بلمسون اقامه
اوندا بلوسن نه ذلتون وار
.
.
گرچه اوزوی بو تختون اوسته
سن نایل آرمان بلرسن
مردان مجاهد و صدیقون
ظلمونله قدین کمان بلرسن
قارداشلاریم ئولمدی سن ئولدون
تخت اوستن انن زمان بلرسن
بیر عده شریر و کاسه لیسه
فخر ائتمه بوگون حکومتون وار
.
.
- پنج شنبه
- 18
- مهر
- 1398
- ساعت
- 13:8
- نوشته شده توسط
- ابوالفضل عابدی پور
- شاعر:
-
مرحوم انور اردبیلی
ارسال دیدگاه