سلام اولا غمی آرامینی آلان بالیا
سلام اولا گئجه آج شامیده قالان بالیا
.
سلام اولا یوزی زهرایه بنذین بالیا
دیار کرب وبلادن قرا گین بالیا
.
سلام اولا اورگین تیر غم بولن بالیا
قوناقینون دوداقیندان ئوپوب ئولن بالیا
.
سلام اولا غمینی اکبره یازان بالیا
گجه مزارینی ئوز عمّه سی قازان بالیا
.
رقیه کیمدی دیوم گلشن حیا گولیدی
رقیه زینب علیا جنابه سوگُلیدی
.
دوتوب خدایه طرف صورت محجّبه سین
یخوب یزیدی پوزوب طمطراق و دبدبه سین
.
رقیه کیمدی دیوم سفره صفا دوزیدی
رقیه فاطمه نون اوغلونون گوزل قیزیدی
.
رقیه کعبه عشقی طواف ایدن حاجیدی
رقیه اکبره باب الحوائجه باجیدی
.
اوخی تواریخی کهنلمین کلامینه باخ
ملائکه سوپورور صحنینی مقامینه باخ
.
رقیه غافل اولان ملّته قاریشمیاجاق
رقیه روز جزا زجریلن باریشمیاجاق
.
کریمه قیزدی بیر عالم سخاسی وار خانمون
دوا گزنلره دارالشفاسی وار خانمون
.
کیمون نه حاجتی وار کردگار حیّه دیسون
نتیجه سین آلا بیر دفعه یا رقیه دیسون
.
ایوینده سفره آچار کیم رقیه نون آدینا
خرابه شامیده آج قالماقی دوشر یادینا
.
توکر سرشکی ویره رونق اخذ توشه سینه
قوری چورک قویار اولده سفره گوشه سینه
.
او سفره نین باشینا خیردا گوشواره قویار
ایاق طرفده ملولانه گاهواره قویار
.
اورک گوزینده چتین محنتین مجّسم ایدر
او سفریه قویا چولدن تیکان فراهم ایدر
.
اشاره دور خانمون محترم قوناقلارینا
تیکان باتوب گجه چولده قابار ایاقلارینا
.
بالاجا تللری ویرانه ده غباره باتوب
دوشوب زمانه ده گوزدن حصیرون اوسته یاتوب
.
غم فراقیدی بیر شمع تک اونی اریدن
یاشادی اوستی آچوق یرده چخدی یوز دریدن
.
سالوب او بلبل گلزاری اوچیلار قفسه
قفسده چوخ داریخوب آغلیوبدی بیر نفسه
.
گوزینه غالب اولوب بیر گجه شیرین رویا
گوروب باباسینی رؤیاده دختر زیبا
.
دولومسنوب چکوب آهی زمانه دن دانشوب
تیکانیدن دانشوب تازیانه دن دانشوب
.
گوزین آچوب یوخودان باشلیوبدی اوخشاماسین
گجه نین عالمی زینبدن ایستیوب باباسین
.
خبر یزیده چاتوب قانلی باشی گوندردی
رقیه اشگینی گوزلرده قانه دوندردی
.
صفاسی آرتدی گجه قانلی باشیلن اطاقون
گوروب دوداقلارینا خیزران دگوب قوناقون
.
اوره گینون باشنی تیر غصه پاره له دی
او قدری وردی الین لبلرینه یاره له دی
.
عزیزه عمه سی گوردی یخلدی دردانه
کول اولدی شمع کنارینده یاندی پروانه
.
دیدی خدنگ محن قلبینی بولن لای لای
یارالی باشی گوروب غصه دن ئولن لای لای
.
بابا سینون سینه سیندن اوخی دَرن لای لای
یاراسی اوسته آچوب زلفینی سرن لای لای
.
الی باشیندا گجه چوللره قاچان لای لای
یاراسی خاطرینه معجرین آچان لای لای
.
خرابه نون قاپوسیندا یولا باخان لای لای
باتان گون یوزینه گوز یاشی آخان لای لای
.
قولاقی شامیده گوشواره گورمین لای لای
آچیلمیان اورگی زلفین هورمین لای لای
.
ئولن باباسی لباس عزا گیین لای لای
قولاقمه گجه عمه آجام دیین لای لای
.
ایاقینین یاراسیندان قانی چیخان لای لای
قوناقینون قاباقیندا جانی چخان لای لای
.
سرشگی چشمه کیمی گوزده داشلانان لای لای
عزاسی شام دیارینده باشلانان لای لای
.
«معزّی» شعروی یاز هر قدر حیاتون وار
سنونده بیر گونی چون موسم مماتون وار
.
- سه شنبه
- 23
- مهر
- 1398
- ساعت
- 14:8
- نوشته شده توسط
- ابوالفضل عابدی پور
- شاعر:
-
استاد یوسف معزی اردبیلی
ارسال دیدگاه