رحلت ایلیوب ختم الانبیا
رهنمای دین مصطفی بوگون
ماتمه باتوب کلّ ماسِوا
باش آچوب شه لافتی بوگون
.
.
نیّر سپهر ولایته
یوز ویروب بوگون حال اختفا
گون باتوبدی اولدوزلار آغلوری
عالمی احاطه ایدوب نوا
سیریدن قالوب انجم و قمر
شورش قیامت اولوب به پا
ساخلیوب عزا ذات کبریا
گوگلره چکوبلر قرا بوگون
.
.
بو همان او گوندور رسالتین
سولدی ظلمیله باصفا گلی
بو همان او گوندور خسوف ایدوب
چرخ عزّتین بدر کاملی
بو همان او گوندور که لاله تک
اهل عالمین قان اولوب دلی
ایلیوبدی سکّان نه فلک
بزم غم بو شاهه به پا بوگون
.
.
بو همان او گوندور که جبرئیل
عالمینه اعلان غم ویروب
بو همان او گوندور که حقّه جان
افتخار کلّ امم ویروب
بو همان او گوندور حسینه یوز
غصّه و ملال و الم ویروب
آغلادان غمی ماسِواللهی
آغلار ایلر آه و نوا بوگون
.
.
بو همان او گوندور که فاطمه
عالمه سالوب وا ابا سسی
بو همان او گوندور که یثربی
دولدوروبدی وامصطفی سسی
بو همان او گوندور که فرشیدن
عرشه اوج ایدوب آه و وا سسی
باش آچوبدی آغلار بو محنته
ساکنین ارض و سما بوگون
.
.
ناخدای دین غرق اولوب بوگون
بحر غم گلوبدی تلاطمه
گلشن هدایت سولوب بوگون
نی کیمی گلوب شوره فاطمه
ناله ایله یثرب دولوب بوگون
گل یوزه ووروب بسکه لاطمه
گل کیمی اولوبدور بو غصّه دن
زرد رنگ خیرُالنّسا بوگون
.
.
جان ویروبدی ایجاد عالمین
علّتی، باتوب ماسِوا غمه
چرخ چاریده ایلیوب اثر
بو ملال عیسی ابن مریمه
نالیه گلوبدی ملائکین
یوز ویروبدی غم روح آدمه
فخر ماسلف رحلت ایلیوب
ماتمه باتوب انبیا بوگون
.
.
شمس دین غروب ایلین زمان
دوره سین آلوبدی ستاره لر
برج عصمتین بدری فاطمه
مجتبی کیمی ماهپاره لر
سس سسه ویروب ایتدیلر نوا
بال و پر شکسته هزاره لر
وای بابا دیوب گوزیاشین توکر
گل یوزه شه کربلا بوگون
.
.
وقت اولوبدی محبوب لم یزل
دار فانیدن کسسین الفتین
تاپشیروب امانت بو امّته
بیر کلام حقّی بیر عترتین
امرینه مخالف اولوبدولار
داندیلار پیمبر وصیّتین
حقّینی وصیّ پیمبرین
غصب ایدوبدولر اشقیا بوگون
.
.
قوردولر سقیفه جفائیله
ایتدیلر بوگون ظلمه فتح باب
روح مصطفانی خطائیله
ایستیوبلر ایتسونله دلکباب
رای ویردی صدق و صفائیله
بو سوزه او مجلسده شیخ و شاب
درگهی بتولین گرک یانا
اولدولار بو امره رضا بوگون
.
.
مرغ روحینه تنگ اولوب قفس
آز قالوب یته جان دوداقینه
آغلیه حسین و حسن یانا
فاطمه شرار فراقینه
آچدی گوزلرین حسرتیله بیر
سوز دیدی علینون قولاقینه
شوره گلدی سس چکدی آغلادی
توکدی اشکینی مرتضی بوگون
.
.
آچدی لعل گوهر نثارینی
ایلدی خطاب اول شه حجیز
سویگلوم بتولی جفائیله
وورسالار اگر فرقه ی ستیز
چاک ایلمه داغلی سینوی
غم گونی، دایان چکمه تیغ تیز
صبر ایله دل آچما شکایته
گلسه هر نه درد و بلا بوگون
.
.
اهل کینه اوز جور و ظلمینی
یاعلی سپهره دایاندیلار
باده ی ریاستله مست اولوب
ثانی باب زهرانی یاندیرار
گه یول اوسته زهرا عذارینه
سیلی جفا ظلمیله وورار
قلبیمی ملول ایلیوب منیم
صون نفس همان ماجرا بوگون
.
.
ترک ایدوبدی دنیانی مصطفی
عرشه اوج ایدوب آه فاطمه
مصطفائیله گیتدی برملا
الدن عزّت و جاه فاطمه
اشقیا بو فکره دوشوب یانا
ظلم الیله درگاه فاطمه
داندیلار پیمبر اوامرین
ایلیوبله بیحد جفا بوگون
.
.
بیر طرفده اوغلی حسین توکر
اشک چشمینی چون دُرِ عدن
بیر طرفده زهرایه یوز ویروب
آه و ناله و محنت و حزن
یرده قالدی جسم مطهّری
کیمسه اولمیوبدی گلوب گیدن
اوز الیله غسلین ویروب قویوب
قبره تک ولیّ خدا بوگون
.
.
درک ایدونجه پیک اجل سنی
ای #امینی یاز آغلا دمبدم
صدق اوزیله بو آستانه ده
غفلت ایلمه وور اوزون قدم
فکریوی آچوبدی بو مطلبه
نوحه خوان #وفائی ویروبدی دم
یالوارون پیمبر براتوزی
بلکه لطفاً ایتسون عطا بوگون
.
- سه شنبه
- 23
- مهر
- 1398
- ساعت
- 14:20
- نوشته شده توسط
- ابوالفضل عابدی پور
- شاعر:
-
مجید امینی
ارسال دیدگاه