چون ثامن الائمه نی مأمون نابکار
مسموم ائدوب ستمله او دون اولدی کامکار
.
چخدی او بزمدن پوزولان حالیلن امام
یوز قویدی منزلینه پریشان و دلفگار
.
بیر نوع زهر کین اثر ائتموشدی اول شهه
معلوم اولوردی رنگ جمالندن آشکار
.
هر بیر نچه قدمده دوراردی چکردی آه
قلبین اووشدوراردی او سلطان تاجدار
.
نه دلده قالدی طاقتی نه دیزده قوتی
آلموشدی زهر کینه وجودیندن اختیار
.
گلدی یتشدی منزلینه شهریار طوس
بیر باخدی صاق صولینا چکوب آه شعله بار
.
گوردی نه واردی محرمی درد دلین دیه
نه واردی باجیسی وئره حالیندن اختبار
.
گه صاق صولا دونور گهی سورتور یوزین یره
گاهی دورور اؤرکده الی ایلور آه و زار
.
گاهی سالور قولونی اباصلت بوینونا
فرمایش ایلوری جگریم یاندی زینهار
.
یوخ بیر نفر بو وقته گلوب حالیمی بوله
همراز اولوب بو بی کسه اولسون معین و یار
.
حسرتله گه باخور قاپویا گوزده اشگ تر
بیر مهربانه ووار دیه سن اوندا انتظار
.
گاهی دیور که اوغلومی الله یتور منه
قویما گوزومی یولدا بو هنگام انتظار
.
آخر نفسده باری گوروم اوغلومون یوزون
قویموبدی هجری سن بولوسن قلبده قرار
.
آگاه سن که مرغ دله تنگ اولوب قفس
چوخ آز قالور او تنگ قفسدن ائده فرار
.
چوخ مایلم که تئز یتیشم بزم وحدته
من بی کسه ولیک بو حسرت اولوبدی یار
.
اوغلوم جواد گلمدی ای خالق رئوف
اولسون نه وقته دین گوزوم حسرتله رهسپار
.
قالموب دوزوم اؤرکده یتور اوغلومی منه
درد فراقی طائر روحه وئرور فشار
.
بیر عمردور وطن یوزینه حسرت اولموشام
ائلدن قبیله دن منی مأمون ائدوب کنار
.
اولما رضا بو حسرتیله جان وئره رضا
معصومه یوخ اولا منِ مظلومه غمگسار
- سه شنبه
- 23
- مهر
- 1398
- ساعت
- 15:15
- نوشته شده توسط
- ابوالفضل عابدی پور
- شاعر:
-
مرحوم حسن عاصی تبریزی
ارسال دیدگاه