ایاقه دور رقیه جان
گئداخ بو غملی خانه دن
آنام جانی یورولموشام
قیزیم بو آشیانه دن
.
.
منیم کیمی بو شامیده
بلالی بیر کس اولمادی
کیمی هرایه سسلدیم
منه وئرن سس اولمادی
ابوتراب عیالینه
ندن بلا بس اولمادی
قوجالمیشام آنام کیمی
بو محنت زمانه دن
.
.
بیزه بو شامون اهلینون
داخی وفاسی اولمادی
شمادت ائتدی کیمسه سی
کیمون حیاسی اولمادی
داش آتدیلار خدادن هیچ
کسون هراسی اولمادی
اورک یانور هله قیزیم
بو ظلم بی بهانه دن
.
.
دوشوبدی باشیمه قیزیم
هوای دشت کربلا
گئدوم تدارک ایلیوم
او یرده محفل عزا
فقط اویرده دور منیم
اورکده دردیمه دوا
وئروب خدا براتیمی
بو خلوت شبانه دن
.
.
ایاقه دور سنیله من
وئراخ رقیه قول قولا
سن عمه سسله جان دیوم
قولوی بوینوما دولا
بابا بابا دیه دیه
سنیله من دوشوم یولا
دویونجا آغلیوم قیزیم
سن اوخشیان ترانه دن
.
.
آچوبدی غملی دفتری
بهانه ایلیوب سوزی
گوزونده اشکی «صادقی»
تیکوب قیزیم سنه گوزی
اگرچه چوخ گناهی وار
اولوبدی معترف ئوزی
عنایت ایله حشریده
عطای خالصانه دن
- سه شنبه
- 23
- مهر
- 1398
- ساعت
- 16:17
- نوشته شده توسط
- ابوالفضل عابدی پور
- شاعر:
-
محمدرضا صادقی
ارسال دیدگاه