ای عمه روزگاریدن
یورولموشام داریخمیشام
بو چرخ کج مداریدن
یورولمیشام داریخمیشام
.
.
باشیمدان عمه جان بابام خیالینی آتانمورام
فراقینه دؤزنمیرم وصالینه چاتانمورام
قوجاقینه چؤخ اورگدیب خرابه ده یاتانمورام
بو غصه لی دیاریدن یورولمیشام داریخمیشام
.
.
آلوبلا گوشواره می، دئمم طلامی ایستیرم
نه وار طعامه رغبتیم نه ده سو جامی ایستیرم
بو نسگیل ئولدورر منی فقط بابامی ایستیرم
داخی بوشام تاریدن یورولمیشام داریخمیشام
.
.
گرکدی میزبان ادب نشان وئره قوناقینه
بابام گلنده قورخورام دورانمیام ایاقینه
ایاقلاریمدا یاره وار نه جور چیخیم قباقینه
یول اوسته زخم خاریدن،یورولمیشام داریخمیشام
.
.
بابام گلن زمان منه حمایت ایله عمه جان
گؤزوم قباقی گؤرمسه هدایت ایله عمه جان
آپار ئوپوم گلن یولون عنایت ایله عمه جان
آماندی انتظاریدن یورولمیشام داریخمیشام
.
.
گلینجه شامه بیلموسوز او یولدا چکمیشم نَلر
ویراندا زجر دون دئدیم هرایمه عموم گلر
چاغیردیم اولمادی گلن گوزوم سرشکینی الر
ئوزومده آه و زاریدن یورولمیشام داریخمیشام
.
.
گلیلیم هایاندادور وفالی قارداشیم منیم
دییم که قانه اکبریم دؤنوبدی گوز یاشیم منیم
ویراندا قمچی ساربان چوخ اینجیوب باشیم منیم
جفای بیشماریدن یورولمیشام داریخمیشام
.
.
او بلبلم که گلشنیم گئدوب خزانه آغلارام
بهاریدن اوزاق سالوب منی زمانه آغلارام
دیلیمده اصغرین آدین ائدوب بهانه آغلارام
فراق شیرخواریدن یورولمیشام داریخمیشام
.
.
.
- سه شنبه
- 23
- مهر
- 1398
- ساعت
- 16:38
- نوشته شده توسط
- ابوالفضل عابدی پور
- شاعر:
-
جعفر صادقی مراغه ای
ارسال دیدگاه