شکر اولا الّلهَه قارداش ویردی مُهلت زینبه
عاقبت قبر شریفون اولدی قسمت زینبه
.
.
خسته گویلوم بسکه بو قبرون چکوب مشتاقینی
شوقدان گورمز گوزوم عرش جلالون طاقینی
توتیا تک زلفیمه قوی تا چکوم توپراقینی
روشن اولسون بیر زمان بو بزم وصلت زینبه
.
.
پرده پرده کشف اولوبدور قلبیمه سرّ حجاب
محضر پاکوندا چون ائتدی مُجیب اولموش مُجاب
قوی آچوم من دل سئواله سنده قیل ردّ جواب
بو کلید نطقیلن آچ باب صحبت زینبه
.
.
چون گوزومدن پردۀ غیبی منیم اولموش کنار
گورسنور کوز کوز اولان جسمون گوزمه آشکار
دوغرانوب باشدان ایاقه بند بندون هر نه وار
وار یری ایمدی یتشسون مین جراحت زینبه
.
.
من اولوم قربان بو جسم جانیوه نه جاندی بو
جسم دور یا بیر داغیلموش جلدسیز قرآندی بو
سینه دور بو یا بو مذهب صفحۀ فرقاندی بو
مشق ایچون آیا یازوبلار بیر کتابت زینبه
.
.
بو کتابت کلمدی گر شامه ائتدیم یاد غم
مکتب ویرانه ده چکدوم اوزوم فریاد غم
درسیمی گوردی روان آزاد ایدوب استاد غم
گلموشم باخ درسیمه باش چک بو ساعت زینبه
.
.
ایلرم بو دفتر سینمده کی درسی بیان
بو اَلِف قدّیمی دال ائتدی ازل شمر و سنان
باغلانوب حرف حسین اوسته قولوم چکدیم فغان
ووردولار بو کلمه ده چوب مصیبت زینبه
.
.
شامه تک دوزدوم نقدری ووردولار قارداش منی
تاب ایدوب درد و غمه چکدیم جفای دشمنی
اوندا گِتدی طاقتیم ووردی یزید دون سنی
یتدی بو غمدن بیر اوزگه درد و مِحنت زینبه
.
.
اود دوتوب بو آتش ظلمیله اُودلاندی باجون
ووردولار قارداش باجون ئولسون سنی یاندی باجون
تاپمادی بیر کس گینه دوندی سنی آندی باجون
باطناً اولدی مدد سندن او ساعت زینبه
.
.
قلبیمه قوّت ویروب ائتدیم یزیده من خطاب
وورما ظالم اؤز قوناقون باغریمی ائتمه کباب
باغلادی اوندا یوزومه سوز یولون ویردی جواب
آچدی لال اولموش دیلین ایتدی شماتت زینبه
.
.
ای خوشا احوالینه هرکیم سنه زوّاردور
وار یری بوردا دیسونلر جابر انصاردور
چون اوزی «غمناک» اولان زوارینه غمخواردور
گوستروب بیر اوزگه عنوانِ مُحبّت زینبه
.
.
قبریدن گویا گلوب سس بولدوروب اوز عزّتین
سن منیله بیر ایدوبسن بو شهادت شرکتین
من شهید اولدوم باجی سن چکدون امّا مِحنتین
عالم معناده وار قبض شهادت زینبه
.
.
- سه شنبه
- 23
- مهر
- 1398
- ساعت
- 17:6
- نوشته شده توسط
- ابوالفضل عابدی پور
- شاعر:
-
مرحوم غمناک تبریزی
ارسال دیدگاه