سنده بیر عریان بدن قویدوم گیدنده کربلا
نه لباسی نه الی نه باش بدنده کربلا
.
.
هاردا دور گوستر منه اول مهربانیم کربلا
قبرینه قربان اولا بو خسته جانیم کربلا
.
.
بیر بدن که تیریله باشدان باشا مجروحیدی
بیر بدن که سم اسبیله یره مطروحیدی
من قوری بیر جسمیدیم اول قانلو پیکر روحیدی
شامه جسمیم گئتدی روحیم قالدی سنده کربلا
.
.
کوفیان سالمیشدیلار بو چولده بیر عریان بدن
بند بندیندن اوزولموش خاکیله یکسان بدن
تار زلفیم تک پریشان شانه تک شان شان بدن
ایله خندان اولمیوب بیر گول چمنده کربلا
.
.
پیکر صدپاره سی قرآن کیمی اوراقیدی
طاقتیم اول نازنین جسمی گورندن طاقیدی
قبرینی گورماقدان اوتری دل خزان یپراقیدی
بلکه دل آرام اولا قبرین گورنده کربلا
.
.
بیکفن قویدوم اونی کوچ ایلینده شامه من
بیر نفر اللهدان اوتری ایلدی آیا کفن؟
یا کفنسیز آلموسان اول پیکری آغوشه سن
گورمسونلر قزلاری عریان ، گلنده کربلا
.
.
کربلاسن خلد اعلاسن و یا باغ ارم
نافۀ آهوی چین ایلر شمیمون آلسا رم
علتی واضحدی بیر دسته غزالان حرم
ظلم الیله دوشدولر سنده کمنده کربلا
.
.
سنده بیر گون کربلا اولدی قیامت زینبه
مین قیامتدن علامت اولدی غارت زینبه
اولمادی قرخ مین نفردن بیر حمایت زینبه
کوفیان خرگاهیمی تاراج ایدنده کربلا
.
.
سنده گوردوم آلتی آیلیق بیر بالا چون برگ تر
قونداقی قانلو اوزی باشسیز یارالی سود امر
سویلوری بیکس آناسی ای منه نور بصر
قان اولا اشگیم اوشاقلار سود امنده کربلا
.
.
ایلدی آل امیه بیزلری سنده اسیر
کوفیه چکدی قطارین اوّلین شمر شریر
کوفه و شامی دولاندوق دست بسته دستگیر
فوق اقطاب اوسته بازولر رسنده کربلا
.
.
بیزلری شامه چکنده اشقیای ناخلف
واریدی منلن ایگیرمی اوچ صغیره باشرف
اون بیری گلدی بقیّه اولدی یوللاردا تلف
گول نجه پرپر اولار صحن چمنده کربلا
.
.
.
کربلا یا کربلا ذکر ائت « حسینی » آغلا ، یان
صادق آل محمد وعده سی دوزدور اینان
آغلاسا هر کیم حسینه ایلسه اشکین روان
جدّیمی ایلر زیارت جان وئرنده کربلا (1)
.
(1) حضرت صادق علیه السلام این کلام را به مسمع که از اشراف کوفه بوده فرموده اند.
.
- سه شنبه
- 23
- مهر
- 1398
- ساعت
- 17:10
- نوشته شده توسط
- ابوالفضل عابدی پور
- شاعر:
-
سعدی زمان سیدرضا حسینی
ارسال دیدگاه