شهِ انبیا ئولنده
وورولوب جلا بهشته
نیه بس حسین ئولنده
چکلوب قرا بهشته
.
.
شه انبیا جهاندان
ایلین زماندا رحلت
اولوب حوریان مزیّن
وئرولوب بهشته زینت
شه تشنه کام ئولنده
دوتوب عرش و فرشی محنت
ائدوب حوریان زلفین
علم عزا بهشته
.
.
شرف جهان پیمبر
او زمانیکه وئروب جان
نه پوزولدی ظلم عالم
نه یر و گوی آغلیوب قان
نه او دم وئروبدی جبریل
یره تاجینی باشندان
نه قورولدی گوگده ماتم
نه دوشوب نوا بهشته
.
.
او منای کربلاده
کسیلنده ذبح اعظم
دوشوب عرش و فرشه ناله
باش آچوب رسول خاتم
چکلوب بهشته قاره
قورولوبدی بزم ماتم
آچلوبدی قتلگهدن
درِ غمفزا بهشته
.
.
قویولان زمان کول اوسته
او جمال جنت آرا
توکوب اشک خون گوزیندن
یوزینه بتول عذرا
گوزی یاشلو عزم مطبخ
ایلیوب انیس حورا
وئروب اول مکانی ترجیح
شرف نساء بهشته
.
.
شب و روز «ناصر» ایستر
او صفالی بارگاهی
نولا درک ائده دوباره
شرف حضور شاهی
ائده هر او کسکه مسکن
او رواق عرش جاهی
او مقامدن گمان یوخ
ائده اعتنا بهشته
.
- پنج شنبه
- 25
- مهر
- 1398
- ساعت
- 12:51
- نوشته شده توسط
- ابوالفضل عابدی پور
- شاعر:
-
مرحوم ناصر اردبیلی
ارسال دیدگاه