دور گلدی باجون غم گونی غم خوارین حسینیم
دلدارین حسینیم
قرخ گونده یوزی گولمدی قیزلارین حسینیم
زوارین حسینیم
.
.
سندن صورا بندیله اسارت منه قالدی
سن گئتدون اخا آهیله محنت منه قالدی
چیخدون یارالی آیدینا ظلمت منه قالدی
هِی آغلادی یولّاردا پرستارین حسینیم
.
.
شامه کیمی یولّاردا باجون دربدر اولدی
اکبرله گلن شمریله گور همسفر اولدی
گه کوفه ده دیل یاره سیلن خونجگر اولدی
گه دوشدی یره خیردا علمدارین حسینیم
.
.
خیردا بالاوون قوش کیمی دیلده سوزی قالدی
بیز گلدوق او ویرانه ده تکجه اوزی قالدی
چوخ گوزلدی اکبر گله یولدا گوزی قالدی
آخر گوزونی یومدی فداکارین حسینیم
.
.
بیر گوشه ی ویرانه ده هِی سینه ویراردی
گه نوحه دیینده اوتوروب گاهی دوراردی
اکبر دئجک اول بوینونی آهیله بوراردی
ذکریدی علی دختر هوشیارین حسینیم
.
.
یانسین فلکی بختی قرا هرگون اوخ اولدی
بیلمم نیه آز سینیده کی دردی چوخ اولدی
خوش گونلری زهرا کیمی دنیاده یوخ اولدی
گوزیاشیله تر ایلدی رخسارین حسینیم
.
.
یاتدی قوری یئرلرده سنه تای باجون ئولسون
اونسوز بورا گلدیم دییَم ایوای باجون ئولسون
گوز یاشیله چالّام سنه لایلای باجون ئولسون
دور یاتما گلوب خسته فداکارین حسینیم
- پنج شنبه
- 25
- مهر
- 1398
- ساعت
- 13:8
- نوشته شده توسط
- ابوالفضل عابدی پور
- شاعر:
-
اصغر الماسی اهری
ارسال دیدگاه