قارداش باجون دوباره گلوب غم دیارینه
حسرتده قالمیوب یتشوب یار یارینه
.
یاد ایلیوب سنی بو بیابانه گلمیشم
دور سنده قیل نظاره بو نالانه گلمیشم
.
ازّل طواف ائدوب بو گوزل قبریوی حسین
قربان اولوم سنون کیمی قربانه گلمیشم
.
دور بیر نوازش ایله بو بیچاره زینبه
بیر باخگلان بو زلف پریشانه گلمیشم
.
لطف ایلیوب سوروشسان اگر حالیمی منیم
ختمی بودور حسین داخی من جانه گلمیشم
.
سن کوفه ده تنوریده مهمان اولان گجه
من آختاروب ربابی بو میدانه گلمیشم
.
دوتدوم سراغ باشیوی بولدوم یرین حسین
دوشدوم یولا او کوفۀ ویرانه گلمیشم
.
مدّت خانملق ایلدیقیم کوفه شهرینه
گوردون اؤزون نه نوعی حقیرانه گلمیشم
.
گورجک جداده باشیوی صبریم تمام اولوب
یاردیم باشیمی ناله و افغانه گلمیشم
.
قانلو باشون سالوبدی منی چوخ بلالره
باشون گئدنده نیزه ده هر یانه گلمیشم
.
ابن زیاد بزمینه گوردوم گئدر باشون
دوشدوم دالنجا منده ذلیلانه گلمیشم
.
گوردوم گئدوبدی دیرده مهمان اولوب باشون
منده قوناق او تازه مسلمانه گلمیشم
.
وارد ائدنده شامه حسین اهل بیتوی
شام اهلی گوردیلر نجه شاهانه گلمیشم
.
اگنیمده کهنه باشدا ولی یوخدی معجریم
گویا خیال ائدوبدوله افسانه گلمیشم
.
بو ذلّته گوروبله دوام ایلیوب باجون
ترویج وئرماقا ولی قرآنه گلمیشم
.
تشخیص وئرماقا هامی بولدی او شهرده
من بینوانی کفریله ایمانه گلمیشم
.
بزم یزیده گر چه قولی باغلی گئتمیشم
اما یزید گوردی دلیرانه گلمیشم
.
بی اعتنا علی قزی زهرایه نائبه
شیرخدا بابام کیمی مردانه گلمیشم
.
یوز دوتدی زینبه دئدی اللهه حمد اولا
غالب بو گون بو زادۀ عمرانه گلمیشم
.
باخ گور نجه بو مجلسه سیز خوار گلمسوز
امّا بو بزمه منده ملوکانه گلمیشم
.
قرآن اوخور کسوک باشی عطشان دوداقیلن
تنبیه ائدم او لبلری عطشانه گلمیشم
.
بولدوم حسین جلالیله مهمان گلوب منه
منده نوازش ائتماقا مهمانه گلمیشم
.
اولدوم خلاص آخری ظلم یزیدیدن
حمد ایلیوب او خالق سبحانه گلمیشم
.
قویمازدیلار منی سنه ماتم دوتام حسین
ازّل او یرده قوردوم عزاخانه گلمیشم
.
جمع ایلدیم عیالیوی گتدیم حضوریوه
دور بیر اؤزون ایاقه یتیش سانه گلمیشم
.
گورسن اگر رقیّه نی یوخدور او جمعده
ایلوب منی اونون غمی دیوانه گلمیشم
.
ائتمه خیال گلدی قزون من گتورمدیم
اولدی یری خرابۀ ویرانه گلمیشم
.
اولماز تمام گرچه دئسم لیک ظاهراً
یتدی مصیبتیم ولی پایانه گلمیشم
.
ال ساخلا «شوری» تمام ائت کلامیوی
گئت کربلایه سویله ذلیلانه گلمیشم
.
بو بیت ازّلی دئنه زینب دیلینجه سن
یاد ایلیوب سنی بو بیابانه گلمیشم
.
.
- پنج شنبه
- 25
- مهر
- 1398
- ساعت
- 13:11
- نوشته شده توسط
- ابوالفضل عابدی پور
ارسال دیدگاه