شامیدن گتدیم حسین قانه باتان پیرهنون
بوریادور آنام اوغلی ، عوض ایله کفنون
.
.
اوتانورسان منه ئوز دردیوی قارداش دیه سن
بیلورم یوخدی الون جامه عشقی گیه سن
زینبون قویماز آنام اوغلی سنی اینجیه سن
سینون اوستن گوتوروب اصغری دیندیرّم حسین
سنه پیراهنی آهسته گیندرّم حسین
.
.
ساربان قطع ایلین اللرووه ویرمارام ال
خنجر شمر کسن حنجرووه ویرمارام ال
قطعه قطعه داغیلان پیکرووه ویرمارام ال
باغلارام یاره وی باشیمده اولان معجریلن
قارداش آسوده یاتارسان صودامر اصغریلن
.
.
واردی بو پیرهنون دورت مینه دین یاره یری
هانسی گوگده گورونور بیر بئله سیّاره یری
قالمیوب زینب مظلومه ده بیر چاره یری
بو همان پیرهنیدور سنه زهرا توخیوب
توخیاندان قوتارینجان نچه قرآن اوخیوب
.
.
وار یری زینب علیایه حسین بیله دیه
صاف یری یوخدی حسین پیرهن عشقی گیه
یثربه گئتسون آپار وئر سن آنام فاطمیه
بیلورم که سوروشار سندن او غمدیده منی
سوله گوندردی حسینون سنه بو پیرهنی
.
.
آنام اول پیرهنی گوستره جک یاره باجی
باوفا یار ئوزی واقفدی بو اسراره باجی
گوزل اسباب شفاعتدی گنهکاره باجی
الده بو پیرهنیم محشره زهرا گله جک
پا برهنه باش آچوق حضرت طاها گله جک
.
.
قبریمون اوسته باجی آغلاما یاندیرما منی
تازه دن رنج و غم و درده بویاندیرما منی
یولما آغ زولفوی صبر ایله اوتاندیرما منی
آغلاما قافله عشقووی حمل ایت وطنه
یولووی گوزلینون چوخدی باجی گئت وطنه
.
.
مشکی آت نهره باجی زینب آپارما وطنه
صاحب مشکون ئولوب مشک نه لازمدی سنه
باجی ئوز دردیوی کشف ائتمه او قولسوز بدنه
قبری اوسته آپاروب مشکی آچوب سرمه باجی
منه خاطر اونا سو مشگینی گوسترمه باجی
.
.
قارداشیم نهر فرات اوسته لب عطشان یخیلوب
صحبت سو ایلمه قلبی دولی قان یخیلوب
دوغرانوب گول بدنی حالی پریشان یخیلوب
خشک اولوب قانی یاتوب ، یاخشیدی پیکان یاراسی
یوخودان دورسا نفس ویرسه وئرر قان یاراسی
.
.
چشمه تک نهر فرات اوسته وئروب قان یاراسی
درد قرآنه ایدوب قانیله درمان یاراسی
سانا گلمزدی وجودینده وئره سان یاراسی
یاره لی شیریمی نهر اوسته اوتاندیرما باجی
قان وئرر یاره لری قانه بویاندیرما باجی
.
- پنج شنبه
- 25
- مهر
- 1398
- ساعت
- 14:0
- نوشته شده توسط
- ابوالفضل عابدی پور
- شاعر:
-
مرحوم نخستین اردبیلی
ارسال دیدگاه