دوشدی دمشقیدن یولا بیر کاروان غم
سر خیل آشنای بلا هم عنان غم
.
مغلوب اولوب مخالفه عشاق، جمع ایدوب
ملک حجازه سوز و گداز ارمغان غم
.
یولاندی ناقه سمت عراقه نوائیلن
تحریر ایدردی زنگ شتر داستان غم
.
خورشید سیز کواکب غم سیره گلدیلر
دولدی نجوم محنتیله آسمان غم
.
بیر دسته دام ظلمه دوشن پر شکسته لر
آزاد اولوبدی آختاروری آشیان غم
.
یتدی تمامه محنت ایام شام شوم
هرچند انتهایه یتوشمز زمان غم
.
ای اهل درد تازه لنوب دردی زینبین
کرببلایه یوز چووروب خاندان غم
.
یو خدور دین خزانه گیدن گلشن هاردادی
غم بوستانینه گیدوری باغبان غم
.
بار المدی توشه سی، سوقاتی گوز یاشی
دلده فغان و سینه ده گنج نهان غم
.
روز ازل خدنگ بلا چله دن چیخوب
اول نظرده زینبی ایتدی نشان غم
.
ام المصائب آدلانوب از بس بلا گوروب
آغوشین ایتدی مهد بلا پاسبان غم
.
چوخلار جهاندا باده محنت ایچیب ولی
میدان صبره زینب اولوب قهرمان غم
.
دنیادن آلدی حشره کیمی شادمانلیقی
کرببلاده باده گیدن دودمان غم
.
یازدی بو نچه بیتی «کلامی»عزا گونی
غم گلشنینده شوره گله بلبلان غم
.
- پنج شنبه
- 25
- مهر
- 1398
- ساعت
- 14:4
- نوشته شده توسط
- ابوالفضل عابدی پور
- شاعر:
-
ولی الله کلامی زنجانی
ارسال دیدگاه