گنه مرغ گوگل بیر نغمۀ خوش داستان تاپدی
غریبه نغمه خوان اولدی عجب شرح وبیان تاپدی
.
قویوب اوز لانه سین ویرانه گئتدی غم دیارینده
دل عشاق تک ویران اولان بیر آشیان تاپدی
.
بهار عمرینی وئردی خزانه جور خاریله
دولاندی شرق و غربی بیر پوزولموش گلستان تاپدی
.
نه گوردی گوللری یکسر اولوبدور خاکیله یکسان
او گلشنده ولی بیر جمع پوزقون باغبان تاپدی
.
وئروب گون سوزی یولدا باغبانلار رنگینه تغییر
شکفته گول کیمی بیر دسته رنگ ارغوان تاپدی
.
دئمه مرغ گوگل آد قویما گَل مقصودی گیزلتمه
حسین قبرین خلاصه زینب بی خانمان تاپدی
.
یوزون قویدی او قبره عرض ائدوب دور گور آنام اوغلی
نه زحمتله سنون قبرون بو یورقون کاروان تاپدی
.
بو مدّتده باجون هئچ استراحت گورمدی یولدا
گلوب دردین دئسون ایمدی سنه دارالامان تاپدی
.
اجازه وئر دیوم اوز دردیمی دارالامانوندا
بو مدتده حسین دارالامان زینب هاچان تاپدی
.
جداده گون کیمی سیر ائتدی باشون شام و شاماتی
شب یلدا باشوندان یولدا فیض شعشعان تاپدی
.
خرابه کوفه ده قودی باشون خولی کول اوستونده
گلوب کول اوسته باشون نصف شب زهرا آنان تاپدی
.
گوتوردی باغرینا باسدی بویوردی وای حسینیم وای
اوغول سن تک قوناق دنیاده هانسی میزبان تاپدی
.
حسین مرجانه اوغلی مجلسینده قویمادی نقصان
تماشایه او بزمه یول تماماً کوفیان تاپدی
.
نصارالر کلیساسینده قالدی بیر گجه باشون
موفق اولدی راهب دین حق انجیلیان تاپدی
.
گجه بیر خردا قز یوللاردا یورقون ناقه دن دوشدی
دایاندی قانلو باشون گئتمدی تا ساربان تاپدی
.
گیرنده شامه باشون بیر بیره شام اهلی سویلردی
امیر شامه هاردان شمر بیله ارمغان تاپدی
.
رعیت شهردن چخدی کناره باغلادی بازار
عجب گون لر حریم عصمت اسلامیان تاپدی
.
حسین دروازۀ ساعتده دوردوخ بیر نچه ساعت
او وضعیله بیزی بیر نچه دسته کف زنان تاپدی
.
خلاصه شامدن شامه دئسم سوز واردی سینمده
نلر گوردوخ نه محنتلر بو زار و ناتوان تاپدی
.
ولی وئرّم اشاره مجلس شطرنجدن قارداش
مباهات ائتماقا چون وقت فرصت شامیان تاپدی
.
نجه مجلس قویولموش بیر طرفده تختۀ شطرنج
دولاندی هر طرفدن می بساطین ساقیان تاپدی
.
یزید ائتدی اشاره ساقیا بیر بادۀ گلگون
عجب بختیم دولاندی بیر بئله خوش بیر زمان تاپدی
.
ایچوب می اوینادی شطرنج اولاندا هر زمان غالب
حریفه اوز غلامیندن دونوب بیر خیزران تاپدی
.
بیزی ویرانه منزلدن ائدنده مجلسه احضار
جفاجولر دولاندی نچّه محکم ریسمان تاپدی
.
قویونلار تک بیزی محکم طنابه باغلادی دشمن
یخلدیم عمه وردین خردا قزلار هم زمان تاپدی
.
قاباقجا سید سجاد باغلاندی من آخرده
او حالیله بیزی مجلس ایچینده ایلچیان تاپدی
.
سوزون ساخلا بو یرده یازما قالسون مطلبون ناقص
حسین قبرین مکرر گورموشم ناقص یازان تاپدی
.
«رفوگر» گورسه بیر وقفه اؤزون قبرون کنارینده
یقین ایلر ایکی دنیاده خیر جاودان تاپدی
.
.
.
- پنج شنبه
- 25
- مهر
- 1398
- ساعت
- 14:11
- نوشته شده توسط
- ابوالفضل عابدی پور
- شاعر:
-
مرحوم رفوگر
ارسال دیدگاه