اگرچه دوشمدیم قرخ گونده هرگز استقامتدن
ولی الله بولور قارداش نه لرچکدیم اسارتدن
.
.
او گون کی کربلاده ئولدی قارداش یار و انصارون
قالوب تک اکبریله قاسم و جعفر هوادارون
شهید اولدی اولار دوغراندی نهر اوسته علمدارون
او گون نوش ایلدون سنده حسین جام شهادتدن
.
.
اجازه وئر سنه عرض ایلیوم قارداش همان ساعت
دیوبدور لشکره سعد اوغلی اولسون خیمه لر غارت
بو چولده اهل بیته یوز وئروبدور آیری بیر حالت
علامت اولدی قارداش زیبنه غارت قیامتدن
.
.
جهالت اهلی هم قرآنی هم پیغمبری داندی
عیال حضرت پیغمبری روم اهلی تک ساندی
گلوب اود ووردولار ظلمیله قارداش خیمه لر یاندی
یانوبدور قیزلارون بیر عده سی ظلم و جسارتدن
.
.
حرم آهولری بیر بیر داغلیدی چوللره قارداش
قاچاندا هر قیزی ووردی آت اوستن فرقه اوباش
آلاندا معجرین گوزدن توکوبلر قورخودان قانیاش
او گوندن قیزلارون وحشتده دور اول قتل و غارتدن
.
.
یاناندا خیمه گاه آل طاها اوج ائدوب دادیم
حسین قوزاندی عرشه آند اولا زهرایه فریادیم
نه گوردوم سسلنور گل عمه امداد ایله سجادیم
باخوب بیر لحظه گوردوم آز قالور یانسون حرارتدن
.
.
حسین تار اولدی دنیا گوزلریمده اول زمان قارداش
باشیمدا محکم ائتدیم معجری بولمم هاچان قارداش
گئچوب سجادیوی اوددان چئخادیم مهربان قارداش
قوتاردیم من یانان بیماریوی نار شرارتدن
.
.
حسین غارت قوتولدی آیری بیر محشر عیان اولدی
گینه بیر ظلم اولوبدور زینبون حالی یامان اولدی
نه گوردوم نیزه نون باشی کسوک باشه مکان اولدی
پوزولموشدی نماسی زینبون ئولسون مرارتدن
.
.
سووشدی ظهر عاشورا گئدوب گون مغربه ساری
اولوب شام غریبانون هامی اشکین ائدوب جاری
یانان چادردا قیزلار جمع اولوب قارداش گئجه یاری
ولی من صبحه تک گوز چکمدیم آل طهارتدن
.
.
گئجه صبحه کیمی غم غصه دن یالواردیم آللهه
حسین بیر نحویلن صبح ایلدیم دوشدوم گونوز راهه
میننده ناقیه قلبیم یانوب قیزلار چکن آهه
آنام جانی یورلدوم ووردولار از بس عداوتدن
.
.
یتوبدور کاروان تا کوفیه بیر ازدحام اولدی
باشوندا گوردی کول آثاری زینب تلخکام اولدی
دئدیم حتما بو یرده باجیوین عمری تمام اولدی
ولیکن زینبون جان تاپدی اعجاز امامتدن
.
.
تلاوت ایلدون سن نیزده آیات قرآنی
حسین بو زینبونده جوش ائدوبدور قلبیده قانی
صراحتله دانیشدیم سن کی گوردون ای وفا کانی
نفسلر سینده حبس اولدی اول دمده حکایتدن
.
.
حسین شاماتیده ووردی عجوزه باشیوه بیر داش
دوباره نیزده جاری اولوبدور تازه بیر قانیاش
دئدی سجاد آنامدان اولمیدیم بار الهی کاش
حسین اود توکدولر یاندی بالام نار جهالتدن
.
.
یولوم بیر مجلسه دوشدی او یردن الامان قارداش
وئریبلر زینبه اوباش ایچینده بیر مکان قارداش
کدورتدن یزید آلدی الینه خیزران قارداش
ووراندا قانیله آغزون دولوب تازه جراحتدن
.
.
قوتولدوم مجلس غمدن خرابه اولدی کاشانه
قولی باغلی عیالون سالدیلار بیر غملی زندانه
رقیه سسلدی از بس سنی ، گلدی قیزیم جانه
بالام ئولدی داخی یوخدور سوزم قارداش خجالتدن
.
.
حسین جان اربعینیندور اولوب « شیدا » عزادارون
گوزی یاشلی دیور ای کاش اولیدیم منده زوارون
آدون یاز دفترونده چوخ پریشاندور بو بیمارون
گلن ایل دعوت ایل قبریوه گلسون عنایتدن
.
- پنج شنبه
- 25
- مهر
- 1398
- ساعت
- 14:23
- نوشته شده توسط
- ابوالفضل عابدی پور
- شاعر:
-
محمدرضا صادقی
ارسال دیدگاه