سلام اولا سنه ای شاه کم سپاه حسین
گلوبدی زینب بی یار و بی پناه حسین
.
تاپوب نجات گلوب عترتون زیارتیوه
قویوبدولار نجه گور یوزلرینی تربتیوه
.
سکینه منزل بی سقفی ایلدی مأوا
داخی گلنمدی بول شمردن ائدوب پروا
.
اونون حکایتینه یوخدور احتیاج بیان
نلر چکوبدی عدودن بیلورسن اول نالان
.
اؤزون او نصف شبی که خرابیه گلدون
سنه یتیمه قزون غملرین دیَه گلدون
.
قوری یر اوسته یاتوب گوردون اول ستم زده نی
او حالینه بیله که آغلادوردی هر گوره نی
.
نه سؤز دئمیشدون او نالانه حال رؤیاده
اویاندی چون یوخودان گلدی ناله و داده
.
بابا بابا دیوب اُول قدری هر یانا قاچدی
تاپانمادی سنی ویرانه دن باشین آچدی
.
یولوب توکردی یره باشنون توکین باشدان
خرابه نون بویادی توپراقینی قان یاشدان
.
حسین یارالی باشون چون اورا طبقده گلوب
باشوی سینه سنه باسدی ناله سی گوده لوب
.
ایکی الیله یاپشدوردی باشوی دؤشینه
ادامه وئردی دوباره فغان و ناله سینه
.
سوؤندوگوندن اوچوب هوش او شیرین دیلدن
باشون دوشنده یخلدی یره دوشوب دیلدن
.
وئرنده جانینی احوالی دوشدی تغییره
دولاندیروب گوزینی هی باخاردی زنجیره
.
ایکی مقامده بو قز الیمدن آلدی قرار
او محنته اؤرگیم یادیمه دوشنده یانار
.
بیری اودور دئدی عمه واریمدی گیزلین سوز
ائشیده نون قولاقنا چو تیغ کسکین سوز
.
قولاقیمه دایادی آغزینی دئدی عمه
میسّر اولسا منه وئر طعام بیر لقمه
.
اؤزون بیلورسن ای عمه نچه گونوزدور آجام
خرابه یرده دلیمه که دگمیوبدی طعام
.
گره لنوب اؤرگیمون باشندا بو دردی
او شاهزاده خانم قز گُرسنه جان وئردی
.
بیریده غسلنه حاضر اولاندا غسّاله
گرک ئولونجه حسین آغلیام بو احواله
.
او قاره کوینگی غسّاله چکدی پارچالادی
دئدی بو طفل نه بیچاره بینوا بالادی
.
یتیمدور گورورم رنگی غصّه دن سارالوب
ولی سبب نَدی یول یول بو گول بدن قارالوب
.
بو تازیانه و ضرب و شکنجه نون یریدور
جفا چکوب اریوب بیر سوموکدی بیر دریدور
.
ایاقی آبله دور رنج راه علامتی وار
پیاده یول یریماخ طفلیله نه نسبتی وار
.
بو ظُلمی هر کیم ائدوبدور یوزی قرا اولسون
ایکی جهاندا اونون خانه سی فنا اولسون
.
خانم سنی وئرورم جان اکبره سوگند
زیارتونله ایله «یحیوینی» سن خرسند
.
.
- سه شنبه
- 30
- مهر
- 1398
- ساعت
- 16:11
- نوشته شده توسط
- ابوالفضل عابدی پور
- شاعر:
-
حاج عباسقلی یحیوی
ارسال دیدگاه