خبر وئر عمه جان آل عبایه
یتشدوق سرزمین کربلایه
.
.
بویور بو کاروان غم دایانسون
توکوب گوز یاشی چون زمزم دایانسون
بو احرامه اولان محرم دایانسون
هامی مشغول اولا سعی و صفایه
.
.
بو یر بیت خدادن محترمدور
حقیقتده بو یر حَقّه حرمدور
آدی کرب و بلا وادیِ غمدور
منای عشقدور اهل ولایه
.
.
کسیلمیش عمّه بوردا نچّه قربان
او قربانلار اولوب مقبول جانان
ایله قربان گورنمز چشم دوران
نقدری گوی یر اوسته سالسا سایه
.
.
بو یرده نور وجه رَبُّ الاعلی
ائدوبدور موسی عشقه تجلّی
ولا اهلینه بو یردور مصلّی
یتر اهل محبت مدّعایه
.
.
خبر وئر عترت حبل المتینه
نزول ائتسون هامی بو سرزمینه
گلوب جدّیم پیمبر اربعینه
اوزی سرخیلدور اهل عزایه
.
.
من عمه ائتمرم هرگز فراموش
که اولدوخ بیز بو یرده محنته توش
آنالار اوغلونی ائتدی کفن پوش
یولا سالدی سوسوز کوه منایه
.
.
بو یرده عمه سو تک آخدی قانلار
بویاندی قاننه نورس جوانلار
ایله بوش قالدی گولدن گلسِتانلار
باخوب بلبل لری گَلدی نوایه
.
.
بویور لیلای زارو دل شکسته
اولان درد و غم هجریله خسته
قراسین سالسون اکبر قبری اوسته
دؤشَنسون شوریله پائین پایه
.
.
رُبابون ساکت ایله آه و زارین
دئنه باشه یتوردی انتظارین
اگر ایستور علی اصغر مزارین
قولاق وئرسون صدای لای لایه
.
.
وئروب اوخ یاره سی هر چند زحمت
نچه گون چکدی آزار و اذیت
یاتوب آغوش شهده ایندی راحت
یتوبدور آرزوده منتهایه
.
.
خبر وئر عمه جان قاسم آناسی
اولان بیر عمر غملر آشناسی
یتوبدور آخره رنج و عَناسی
دویونجا آغلاسون اول مه لقایه
.
.
اوزونده خردا قزلاردا حرمده
کنار قبر شاهِ محتشمده
توکون گوز یاشی بو عالی حرمده
سبیل اشک ائدون تشنه فدایه
.
.
سن اوخشا آل طاها آغلاسونلار
یوزه اشک مصیبت باغلاسونلار
شرار آهیله دل داغلاسونلار
یاناخ یکسر بو محبوب خدایه
.
.
نظر قیل عمه جان کلثوم زاره
نئجه گور بیر توکور قانیاش عذاره
ائدور قبر ابوالفضله نظاره
یانور دلدن جفای اشقیایه
.
.
خیال ایلور نجه بو سرو قامت
یاتوب بیر خردا قبرین ایچره راحت
اونون حالین بو قبر ایلر حکایت
نقدری توش اولوب جسمی یارایه
.
.
مرض بیر مدتی اولدی نصیبیم
دوشاخه اولدی بوینومدا حبیبیم
دوا ائتدی بو درده اؤز طبیبیم
یتوردی لطفیله خاک شفایه
.
.
اؤزون «عاصی» سالوبدور بو کمنده
واریدی چشم امّید عمه سنده
اونی قویما دوشه بو قدر بنده
نیازی واردی احسانه عطایه
.
- سه شنبه
- 30
- مهر
- 1398
- ساعت
- 16:18
- نوشته شده توسط
- ابوالفضل عابدی پور
- شاعر:
-
مرحوم حسن عاصی تبریزی
ارسال دیدگاه